ՀՀԿ ԳՄ նիստից առաջ Հովիկ Աբրահամյանը, պատասխանելով լրագրողների հարցին, անդրադարձավ կառավարությունում երեկ կայացած գործարարների հետ հանդիպմանը։ Հ. Աբրահամյանը նշեց, որ գործարարներին որևէ ուլտիմատում չի տրվել, պարզապես իրենք խաղի նոր կանոններ են սահմանում: «Ես ուզում եմ ևս մեկ անգամ ասել, որ որևէ ուլտիմատում որևէ ժամանակ չի եղել, պարզապես կառավարությունը առաջարկում է խաղի նոր կանոններ, աշխատել նոր ձևով, ավելի թափանցիկ, ավելի անկեղծ: Սա է եղել մեր նպատակը: Որևէ մեկին ահաբեկել, որևէ մեկին պայմաններ առաջարկել չի եղել»։
«Առաջին լրատվական»-ը հարցրեց՝ վարչապետն ինչպե՞ս է պատկերացնում՝ շարքային գործարարները և, ասենք, իր խնամի Գագիկ Ծառուկյանը, Սամվել Ալեքսանյանը, ֆինանսների նախարար Գագիկ Խաչատրյանը ինչպե՞ս են աշխատելու հավասար պայմաններում: Վարչապետը նախ չհամաձայնեց, որ Գագիկ Խաչատրյանը գործարար է, ասաց, թե որևէ մեկը պաշտոն զբաղեցնելուն զուգահեռ չի կարող գործարարությամբ զբաղվել:
«Իմ ասած խաղի կանոնները բոլորին են վերաբերում՝ ինձնից սկսած: Եթե ես չզբաղվեմ գործարարությամբ, որևէ չինովնիկ չի կարող գործարարությամբ զբաղվել: Ես որևէ անուն չեմ ուզում անջատել և ուզում եմ ասել, որ բոլորը պետք է անեն մեր առաջարկած խաղի կանոնները: Եթե չաշխատեն՝ուրեմն,գնդակն իրենց դաշտում է.դա կլինի այլ օպերայից»։