Լիբիայի առաջնորդ Մուամար Քադաֆին հարցազրույց է տվել իտալական Il Giornale թերթին, որում սուր քննադատության է ենթարկել եվրոպական պետությունների ղեկավարներին և անդրադարձել է Լիբիայում ստեղծված ներքաղաքական իրավիճակին:
Քադաֆին ասել է, որ ապստամբները պարտություն են կրում մարտի դաշտում, իսկ Լիբիայի ժողովուրդն իր կողքին է: «Նրանք հույս այլևս չունեն, իսկ նրանց մտահղացումը տապալվել է»,- ասել է Քադաֆին ապստամբների մասին:
Քադաֆին նշել է, որ պատրաստ է դաշինք կնքել «Ալ-Քաիդա»-ի հետ, եթե օտարեկրյա ներխուժում լինի Լիբիա: «Եթե մեր վրա գրոհեն, մենք «սրբազան պատերազմ» կհայտարարենք»,- ասել է Լիբիայի առաջնորդը: Եվրոպացիներին նա զգուշացրել է, որ եթե իր կառավարությունը, որը տարածաշրջանում կայունություն է ապահովում, տապալվի, ապա Միջերկրական ծովը կվերածվի քաոսի ծովի, իսկ Եվրոպան կտուժի Աֆրիկայից այնտեղ հորդած միլիոնավոր աֆրիկացիներից:
Գնդապետ Քադաֆին նաև հայտարարել է, որ «դավաճանվել է եվրոպացի լիդերների կողմից»: «Ես չգիտեմ, թե ինչպես խոսեմ Սիլվիո Բեռլուսկոնիի հետ»,- ասել է Քադաֆին` ակնարկելով, որ ամենաջերմ և մտերիմ հարաբերությունները նա ունեցել է Իտալիայի վարչապետի հետ:
«Այն ժամանակ, երբ եվրոպական երկրներում իշխանության կգա ընդդիմությունը, լիբիացի ժողովուրդը նորից կսկսի մտածել Եվրոպայի հետ նոր հարաբերությունների մասին»,- եզրափակել է նա:
