Խոշոր գործարարների կամ օլիգարխների հետ Հովիկ Աբրահամյանի, այսինքն՝ նրանցից մեկի հանդիպումը, ըստ էության, ազդարարեց, որ Հայաստանն անցնում է արտակարգ ռեժիմի պայմանների: Ռուսաստանի տնտեսությունն էապես սկսել է զգալ տնտեսական պատժամիջոցների ծանրությունը: Այդ ծանրությունը սկսել է արտահայտվել նաև Հայաստանի քաղաքացիների վրա, որոնք աշխատում են Ռուսաստանում: Շատերն արդեն անսպասելի կերպով վերադարձել են, քանի որ նրանց աշխատատեղերի մի մասը փակվել է:
Սրանք, իհարկե, դեռ ծաղիկներն են այն հետևանքների, որ ռուսաստանյան տնտեսությունը զգալու է արևմտյան պատժամիջոցների պատճառով՝ վճարելով Պուտինի ամբիցիաների համար: Իսկ ռուսական տնտեսության կցորդի վերածված Հայաստանը, ըստ էության, այդ ամենի հետևանքներից անմասն չի մնալու: Հովիկ Աբրահամյանը օլիգարխիային առաջարկում է ըստ էության պատրաստվել այդ վատթարին:
Այստեղ իհարկե նկատելի են Աբրահամյանի և Տիգրան Սարգսյանի տարբերությունները: Այստեղ նրա, այսպես ասած, պրագմատիկությունն ընդգծվում է: Ի տարբերություն Տիգրան Սարգսյանի՝ Հովիկ Աբրահամյանը պատրանքներ չունի, թե Ռուսաստանի ճգնաժամից փախչող կապիտալը գալու է Հայաստան: Եվ նա, ըստ էության, օլիգարխներին առաջարկում է պատրաստվել սեփական կապիտալը հանելուն, որովհետև հակառակ դեպքում մեծանում է բունտի հավանականությունը՝ և՛ սոցիալական վիճակն է լարվելու, և՛ նաև հեղափոխական զանգվածը Ռուսաստանից կամաց-կամաց տուն է վերադառնալու: Եվ որպեսզի այդ ամենին հնարավոր լինի պահել, օլիգարխներին հարկ կլինի սեփական կապիտալը օֆշորներից վերադարձնել Հայաստան, գոնե մի մասով: Այսինքն՝ որպեսզի բոլորիս վերջը վատ չլինի, ավելի լավ է մի քիչ գումար հանենք մեր գրպանից այսօր, ըստ էության, ասում է Հովիկ Աբրահամյանը օլիգարխներին՝ նախապատրաստելով նրանց վատթարին:
Մյուս կողմից, Հայաստանում ստեղծվել է շատ հետաքրքրական մի վիճակ: Երևի թե պատահական չէ, որ Սերժ Սարգսյանն իշխանությունը սկսեց հանձնել օլիգարխիային հենց ռուս-արևմտյան ճգնաժամի բովում: Ամենայն հավանականությամբ, Սարգսյանը գիտակցում էր, որ առջևում վատթարն է: Նա փորձեց խուսափել դրա համար պատասխանատվությունից կամ կիսել պատասխանատվությունը օլիգարխիայի հետ, որը պահանջում էր իշխանություն և Տիգրան Սարգսյանի կառավարության պաշտոնանկություն: Հիմա Հովիկ Աբրահամյանը, ըստ էության, հիշեցնում է օլիգարխիային, որ պահանջը իրականացվել է, և եկել է դրա համար վճարելու ժամանակը: Ասել կուզի՝ Սերժ Սարգսյանն իրականում ոչ թե հանձնել, այլ վաճառել է իշխանությունը: Հայաստանի ինքնիշխանությունը նա վաճառել է Ռուսաստանին, իսկ իշխանությունն էլ վաճառել կամ գուցե թե ավելի ճիշտ կլինի ասել՝ վարձակալության է տվել օլիգարխիային՝ գումար հավաքող էլ նշանակելով Հովիկ Աբրահամյանին:
Հովիկ Աբրահամյանը, ըստ էության, երեկ հիշեցրել է վարձակալության գումարների մասին, ինչպես տոնավաճառում է: Ըստ էության, ներկայիս «վերնախավ» կոչվածը նոր չէ, որ Հայաստանը վերածել է տոնավաճառի, որտեղ ամեն մի օլիգարխ իրեն հատկացված տաղավարն ունի կամ տաղավարները: Հիմա այդ տոնավաճառում տեղի է ունեցել վերադասավորում, այսինքն՝ ոմանց տաղավարներն ավելի լավ տեղեր են բերվել, ոմանց տաղավարները տարվել են հետին տեղեր, և հարկ է առաջացել կատարել նախ վարձակալական վճարների փոփոխություն, ինչով էլ, ըստ էության, զբաղվել են օլիգարխները Հովիկ Աբրահամյանի գլխավորությամբ փակ նիստի ընթացքում:
Լուսանկարը՝ Photolure-ի
