Թուրքական Bianet կայքի փոխանցմամբ, Balyoz («Կռան») ռազմական հեղաշրջման գործով ձերբակալվել են ևս 4 բարձրաստիճան զինվորականներ, որով վերջիններիս թվաքանակը հասավ 161-ի: Բրիգադի գեներալ Հաքան Աքքոչը, փոխգնդապետ Բահթիյար Էրսայը և գնդապետներ Նեդիմ Ուլուսանն ու Մեհմեթ Ալփերը բերման են ենթարկվել արտերկրից:
Ներկայումս Ստամբուլի 10-րդ ծանր հանցավորությունների դատարանում ընթանում է Balyoz-ի 15-րդ դատալսումը: Կասկածյալների թվում են հայտնվել 196 անձինք, որոնցից 161-ը ձերբակալված են:
Հիշեցնենք, որ 2010 թվականի հունվարի 20-ին թուրքական Taraf թերթը հրապարակեց 2003 թվականին պլանավորված ռազմական հեղաշրջման պլանի մանրամասների վերաբերյալ մի հոդված: Զինվորականները դժգոհ էին մնացել 2002 թվականի նոյեմբերյան խորհրդարանական ընտրությունների արդյունքներից, որոնցում վստահ հաղթանակ էր տարել կրոնական ու իսլամիստական կողմնորոշմամբ հայտնի Արդարություն և զարգացում կուսակցությունը (ԱԶԿ):
Այդ պլանը ստացել էր Balyoz («Կռան») անվանումը և մշակվել 2002-2003 թվականներին: Այն հավանության է արժանացել զինված ուժերի 162 սպաների, այդ թվում նաև 29 գեներալների հանդիպման ժամանակ:
Դրա համաձայն, նախատեսված էր երկրում հայտարարել արտակարգ դրություն և քաոսի ու բռնության մթնոլորտի ստեղծման ճանապարհով հեղաշրջման կազմակերպման համար համապատասխան հիմք ստեղծել: Դավադիրների կարծիքով, քաոսային իրավիճակի ստեղծումը և բազմաթիվ զոհերը, ուղիղ հեռարձակման հետ մեկտեղ, անհրաժեշտ էֆեկտ էին ապահովելու իրենց նպատակին հասնելու համար:
Թուրքական մի շարք փորձագետներ կարծում են, որ 2003 թվականին կարող էր տեղի ունենալ Թուրքիայի Հանրապետության ողջ պատմության մեջ ամենաարյունալի հեղաշրջումը: