Ադրբեջանական Turan լրատվական գործակալության փոխանցմամբ՝ Human Rights Watch (HRW) միջազգային իրավապաշտպան կազմակերպությունը 10 էջանոց փաստաթուղթ է հրապարակել՝ կապված Ադրբեջանում մամուլի ազատության խնդրի հետ.
«Ադբեջանում նվազագույնը 8 լրագրող և 3 իրավապաշտպան է գտնվում բանտերում, իսկ ազատ արտահայտվելը լրջորեն սահմանափակված է: Միևնույն ժամանակ, այդ երկիրը ՄԱԿ-ի հովանու ներքո անցկացնում է Ինտերնետի ղեկավարման ֆորում (IGF):
Ադրբեջանի կառավարությունը պետք է օգտագործի այս հնարավորությունը՝ ձերբակալված լրագրողներին ու ակտիվիստներին ազատ արձակելու, ապաքրեականացնելու զրպարտանքը և վերացնելու մայրաքաղաքի կենտրոնում ընդդիմության միտինգների անցկացման վրա դրված արգելքը:
Ադրբեջանի իշխանությունները խոսքի ազատությունը սահմանափակում են նաև խաղաղ բողոքի ակցիաների բռնի ցրմամբ և խաղաղ ցուցարարների ձերբակալմամբ: Ակտիվիստները հաճախ օգտագործում են սոցիալական ԶԼՄ-ներ՝ խաղաղ ցույցեր կազմակերպելու համար, սակայն 2006 թվականից սկսած՝ իշխանությունները Բաքվի կենտրոնում չեն արտոնել ընդդիմության որևէ ակցիա:
Այդպիսի ամբողջական արգելքը հակասում է Ադրբեջանի միջազգային պարտավորություններին, որոնք առնչվում են ազատ արտահայտվելու և ազատ հանրահավաքների հանդեպ հարգանք ցուցաբերելուն: Ադրբեջանը պետք է իր քաղաքացիներին ազատ արտահայտվելու հնարավորության տա՝ խուսափելով բռնություններից:
ՄԱԿ-ի գլխավոր քարտուղար Պան Գի Մունը, որն այդ ֆորումի, որը Բաքվում տեղի է ունենալու նոյեմբերի 6-9-ը, ֆորմալ կազմակերպիչն է, պետք է Ադրբեջանի կառավարությանը հիշեցնի մարդու իրավունքների ոլորտում նրա ստանձնած իր պարտականությունների մասին»:
