Մինչ լրատվամիջոցներն ակտիվորեն լուսաբանում և տարածում են կառավարության վաղվա նիստի օրակարգում ընդգրկված «սկանդալային որոշման նախագիծը», որը վերաբերում է Գյումրու տեխնոպարկի լուծարմանը, և դա լրատվամիջոցներում մեկնաբանվում է որպես նոր կառավարության կողմից նախկին վարչապետ Տիգրան Սարգսյանի ծրագրերի վերացում, պարզվում է, որ տեղի ունեցածը սովորական թյուրիմացություն է:
Կառավարության վաղվա նիստի օրակարգում ընդգրկված որոշման նախագիծը չի վերաբերում «Տիգրան Սարգսյանի տեխնոպարկին»: Խոսքը մեկ այլ, բայց նույն անվանումը կրող փակ բաժնետիրական ընկերության մասին է, որը բացվել է 2006 թվականին և այդպես էլ որևէ գործունեություն չի իրականացրել: Իսկ բուն «Գյումրիի տեխնոպարկը» արդեն աշխատում է հունվարից սկսած: Տեխնոպարկում արդեն իսկ տեղակայված են բազմաթիվ կազմակերպություններ, և որևէ խնդիր չկա:
«Խոսքը մի կազմակերպության մասին է, որը ժամանակին ստեղծվել է և իր անունը դրել «Գյումրիի տեխնոպարկ» ՓԲԸ: Դա ոչ մի կապ չունի Գյումրիի տեխնոպարկի ծրագրի հետ ո՛չ ֆինանսապես, ո՛չ բովանդակային և ոչ էլ ժամանակային առումով: Սա պարզապես անունների համընկնում է, որը բերել է թյուրիմացության: Բացի դրանից՝ Գյումրիի տեխնոպարկը ՓԲԸ չէ, «Ձեռնարկությունների ինկուբատոր» հիմնադրամի կողմից է իրականացվում և անվանվում է Գյումրիի տեխնոլոգիական կենտրոն: Այդ ՓԲԸ-ն ստեղծվել է 2006-ին, իսկ մենք «Գյումրիի տեխնոպարկի» ծրագրի մասին սկսել ենք խոսել 2008-ից սկսած»,- «Առաջին լրատվական»,-ի հետ զրույցում ասաց Գյումրիի տեխնոպարկի ամբողջական ծրագրերի պատասխանատու Բագրատ Ենգիբարյանը՝ հավելելով. «Իսկ տեխնոպարկը նորմալ աշխատում է, բացվել է հունվարից: Տեխնոպարկում տեղակայված են կազմակերպություններ՝ ամերիկյան, ֆրանսիական, տայվանական, հայկական կապիտալով, արդեն իսկ գործում են լաբորատորիաները: Արդեն մեկ անգամ հասցրել ենք ներդրումային ֆորում անցկացնել 400 մասնակիցներով: Եվրամիությունն է այստեղ միջոցառումներ անում: Այնպես որ ոչ մի խնդիր չկա: Էկոնոմիկայի նախարարության որոշումը մեզ չի վերաբերում, սա, կրկնում եմ, պարզապես անունների համընկնում է, որը բերել է թյուրիմացության»:
Ենգիբարյանի խոսքով՝ եթե աշխատանքները նորմալ ընթանան, ապա հունիսի սկզբին Սերժ Սարգսյանի մասնակցությամբ տեղի կունենա տեխնոպարկի պաշտոնական բացումը:
Նշենք, որ Շիրակի մարզպետ Ֆելիքս Ցոլակյանը ևս «Առաջին լրատվական»-ի հետ զրույցում հաստատեց, որ թյուրիմացություն է տեղի ունեցել և Գյումրիի տեխնոպարկը շարունակում է առաջվա պես գործել:
Հիշեցնենք, որ «Գյումրու տեխնոպարկի» ծրագիրը ՀՀ կառավարության կողմից ներկայացվել է 2008 թվականին՝ տարածքային զարգացման և աշխատատեղերի ստեղծման առավել ընդգրկուն ռազմավարության շրջանակում: Տեխնոպարկի ծրագրի նպատակն է խթանել Գյումրիում տեղեկատվական և բարձր տեխնոլոգիաների ոլորտների զարգացումը՝ նկատի ունենալով այդ ոլորտում Հայաստանի ընտրած ռազմավարությունը և ոլորտի զարգացման միջազգային հեռանկարները: Ծրագիրն ուղղված էր Երևանի ու մարզերի միջև անհամամասնությունների կրճատմանը, գործարար միջավայրի բարելավմանը և Գյումրի քաղաքի սոցիալ-տնտեսական հիմնախնդիրների լուծմանը։
Լուսանկարը՝ Photolure-ի
