Վրաստանում հունիսի 15-ին տեղի կունենան տեղական ինքնակառավարման մարմինների ընտրություններ: Երկրի 12 խոշոր քաղաքներում, այդ թվում՝ մայրաքաղաք Թբիլիսիում, ընտրվելու են քաղաքապետեր: Վրաստանի քաղաքացիներն ընտրելու են նաև 59 տեղական վարչակազմերի ղեկավարների:
Թեպետ ցուցակները վերջնականապես պատրաստ չեն, այդուհանդերձ հավանական չէ, որ Թբիլիսիում իշխող կուսակցության՝ «Վրացական երազանքի» ցուցակի անցողիկ տեղերում հայեր լինեն:
Հայաբնակ Ջավախքում ընտրվելու է ոչ թե քաղաքապետ, այլ մունիցիպալիտետ՝ տեղական ինքնակառավարման մարմին: Ջավախքը չի մտնում ինքնակառավարվող քաղաքների ցանկում: Ջավախքցիներն ընտրելու են վարչության նախագահ, ինչպես նաև 37 պատգամավոր՝ 15-ը միամանդատ, 22-ը՝ բազմամանդատ:
Ջավախքը կանգնած է խնդրի առջև: Նման հայտարարություն «Առաջին լրատվական»-ի հետ զրույցում արեց «Վիրք» կուսակցության նախագահ Դավիթ Ռստակյանը: Նա ցավով նշեց, որ այս ընտրություններին կարծես թե գործելու են նախկին «բարի ավանդույթները»:
Ռստակյանը պատմեց, որ նախկինում, օրենքի խախտումով, անվտանգության ռեգիոնալ մարմինն էր կազմում պատգամավորների ցուցակը, և նախկին նախագահ Միխեիլ Սաակաշվիլիի ղեկավարած «Ազգային միացյալ շարժման» թեկնածուներն այժմ «Վրացական երազանք» կուսակցության կազմում են, ու նրանք էլ ընդգրկվելու են արդեն այս ընտրությունների ցուցակներում:
«Վիրք» կուսակցության նախագահն ընդգծեց, որ այդ մարդկանց մեջ չկան այնպիսիք, որոնք հայանպաստ քաղաքականություն են վարել․ «Ես չգիտեմ. շուտով լեզվի, երկաթուղու խնդիր է լինելու, այդ մարդիկ միշտ հակահայկական լուծումներ են տվել մեր խնդիրներին, հիմա ի՞նչ պետք է անեն»։
Ռստակյանը նշեց, որ միակ հուսադրող հանգամանքն այն է, որ երկու ընդդիմադիր կուսակցություններ ևս թեկնածու են առաջադրելու: Դրանք են՝ «Նոր աջերը» և «Ազատ Վրաստանը»: Այդ երկուսը բավական մեծ համբավ ու դրական տպավորություն են թողել ջավախքցիների շրջանում:
«Ես կարծում եմ, որ մեր գլխին մեծ դժբախտություն կլինի, եթե Սաակաշվիլու մարդիկ նորից մեր պատգամավորները լինեն: Նրանք նախկինում էլ ոչ լեգիտիմ էին և մեր շահերը չեն սպասարկել, հիմա էլ պատմությունը կրկնվում է: Առայժմ, սակայն, վերջնական չեն ցուցակները, հայտնի էլ չէ, թե այստեղ ով է ղեկավարելու «Վրացական երազանքի» շտաբը, դեռ վերջնականապես հայտնի չէ նաև, թե ով է լինելու «Վրացական երազանքի» վարչության նախագահի թեկնածուն:
Ի դեպ, նախկինում վարչության նախագահին ընտրում էին հենց պատգամավորները, օրենքի փոփոխությամբ այս անգամ ընտրելու է բնակչությունը:
Մենք զրուցեցինք նաև Ջավախքի շրջանային ժողովի պատգամավոր Ֆյոդոր Թորոսյանի հետ, որը մտադիր է ինքնառաջադրվել որպես վարչության նախագահի թեկնածու: Նա «Առաջին լրատվական»-ին պատմեց, որ առայժմ որոշել է ինքնառաջադրվել, բայց եթե որևէ կուսակցությունից առաջարկ ստանա՝ կմտածի դրա շուրջ: «Դեռ խառնաշփոթ է, շատ բան չեմ կարող ասել, նախընտրական արշավն էլ սկսված չէ, մայիսի 16-ից հետո ամեն ինչ պարզ կլինի: Առայժմ հստակ ոչինչ ասել չեմ կարող: Հույս ունենք, որ այս ընտրությունները դրական ավարտ կունենան, իշխանափոխությունից հետո տեղական ինքնակառավարման մարմինների առաջին ընտրություններն են Վրաստանում»,- ասաց նա: