Արարատի և Վայոց Ձորի մարզերի ընդհանուր իրավասության դատարանում Ռոբերտ Պապոյանի նախագահությամբ ավարտվել է Մանե Գասպարյանի (անուն-ազգանունը փոխված է) գործի դատական քննությունը:
Ըստ մեղադրանքի՝ 22-ամյա, փաստացի ամուսնալուծված Մանեն, նախազգուշացված լինելով սուտ մատնության համար նախատեսված քրեական պատասխանատվության մասին, 2013 թվականի դեկտեմբերի 9-ին ոստիկանությունում տվել է հանցագործության մասին սուտ հաղորդում, որը զուգորդվել է ծանր հանցագործության համար մարդկանց մեղադրելով:
Առաջադրված մեղադրանքի համաձայն՝ Վայոց Ձորի մարզի բնակիչ Ա. Գ.-ն Մանեի հետ տևական ժամանակ ինտիմ կապի մեջ է եղել: Այնուհետև ընտանեկան խնդիրներից խուսափելու համար 2013 թվականի նոյեմբերի սկզբից տղամարդը հրաժարվել է Մանեի հետ հանդիպելուց, ցանկացել է խզել նրա հետ ունեցած հարաբերությունները:
Մանեն Ա. Գ.-ի բարեկամ, նույնպես Ա. Գ. սկզբնատառերով երիտասարդին է դիմել իրեն ու նախկին սիրեկանին հաշտեցնելու խնդրանքով, բայց բարեկամ Ա. Գ.-ն ոչ միայն չի կատարել Մարինեի խնդրանքը, այլև ընդհանրապես հրաժարվել է այդ հարցով միջնորդ լինելուց:
Մանեն խիստ վիրավորվել է:
Դրանից հետո, ըստ մեղադրանքի, դեկտեմբերի 8-ին մարզի գյուղերից մեկի տարածքում գտնվող տնակում Մանեն իր կամքով երկու Ա. Գ.-երի հետ մեկական անգամ սեռական հարաբերություն է ունեցել, ապա վրեժխնդրության հողի վրա հաջորդ օրը՝ դեկտեմբերի 9-ին, ոստիկանությունում հանցագործության մասին հաղորդում է տվել՝ երկու Ա. Գ.-երին միանգամից մեղադրելով սպառնալիքների ազդեցության տակ խմբով իրեն բռնաբարելու և իր նկատմամբ սեքսուալ բնույթի բռնի գործողություններ կատարելու համար:
Մանեին մեղադրանք է առաջադրվել ՀՀ քրեական օրենսգրքի 333 հոդվածի 2-րդ մասի 1-ին կետով:
Ընդհանուր իրավասության դատարանում Մանեն իրեն լիովին մեղավոր է ճանաչել: Գործը քննվել է արագացված ընթացակարգով:
Դատարանը հաշվի է առել, որ դեռ 2003 թվականին Մանեի ծնողներն ամուսնալուծվել են:
Աղջիկը 12 տարեկանից ապրել է առանց մոր խնամքի՝ տատի, հորաքրոջ և հոր խնամքին, ընդ որում՝ հայրն էլ պարբերաբար բացակայել է ընտանիքից:
Ներկայումս Մանեն բնակվում է տատի հետ, ընտանիքը սոցիալապես անապահով է ու ստանում է աղքատության նպաստ, Մանեի հայրը բնակավայրից բացակայում է…
Որպես պատասխանատվությունն ու պատիժը մեղմացնող հանգամանք՝ դատարանը հաշվի է առել Մանեի կողմից մեղայականով ներկայանալը, խոստովանական ցուցմունքներ տալը:
Հանցագործության մասին սուտ հաղորդում տալու նույն օրը Մանեն քննչական բաժնի պետին դիմում է ներկայացրել, որ Ա. Գ.-երի հետ սեռական հարաբերություն է ունեցել իր համաձայնությամբ, ոչ թե իր կամքին հակառակ, և որ իր նկատմամբ բռնություն չի գործադրվել: Նա հայտնել է, որ սուտ հաղորդում է տվել վրեժի շարժառիթով:
Ընդհանուր իրավասության դատարանը Մանեին մեղավոր է ճանաչել սուտ մատնություն կատարելու համար և դատապարտել է 1 տարի ազատազրկման, ապա պայմանական դատապարտություն է կիրառել ու սահմանել 2 տարի փորձաշրջան:
