Երբ ՌԴ-ն Հայաստանին ասի, թե ինչ է թույլ տալիս ԵՄ-ի հետ համագործակցության վերաբերյալ, այդ ժամանակ ՀՀ-ն ԵՄ-ին կներկայացնի ՀՀ-ԵՄ հետագա հարաբերությունների տեսլականը: Այս մասին այսօր «Առաջին լրատվական»-ի հետ զրույցում ասաց Գլոբալիզացիայի և տարածաշրջանային համագործակցության վերլուծական կենտրոնի (ԳՏՀՎԿ) ղեկավար, քաղաքական վերլուծաբան Ստեփան Գրիգորյանը՝ անդրադառնալով ՀՀ-ում Ֆրանսիայի նախագահ Ֆրանսուա Օլանդի մեկնաբանությանը, թե Հայաստանը կարող է ունենալ ԵՄ-ի հետ ասոցիացիա նոր մոդելով:
Նա նշեց, որ այսօրվա հրատապ թեման հետևյալն է՝ ինչ անել, եթե Հայաստանն անդամակցի ՄՄ-ին: Այստեղ սկզբունքայինը, ըստ նրա, անդամակցության հնարավորության դիտարկումն է: Քաղաքագետի պնդմամբ՝ անդամակցության դեպքում հայ-եվրոպական օրակարգ չի կարող լինել՝ հասկանալի պատճառներով, քանի որ կան խաղի կանոններ, որոնք կբերեն սահմանափակումների, իսկ եթե չդառնա ՄՄ անդամ, կամ այդ գործընթացը ձգձգվի, որի հույսերը նա ունի, ապա հնարավոր կլինի ձևավորել այս օրակարգը:
«Եթե դառնանք ՄՄ անդամ, կսկսվեն նոր քննարկումներ, Եվրոպայի հետ նոր համագործակցություն՝ նոր իրողությունների պայմաններում:
Եթե մենք դառնանք ՄՄ անդամ, ավտոմատ կերպով առևտրի, ազատ շուկայական հարաբերությունների ոլորտում Եվրոպայի հետ կառաջանան նյուանսային խնդիրներ: Դա ակնհայտ է, քանի որ խաղի կանոններն իրար հակասում են: Օրինակ՝ երբ մենք դառնանք ՄՄ անդամ, կոռուպցիան կարող է լինել 100%-անոց. ոչ ոք մեզ չի ասում, որ կոռուպցիա չպետք է լինի, կլինի կոռուպցիա, ինչը նշանակում է, որ Եվրոպայի դռները մեր առաջ կփակվեն: Կամ՝ հարկերի, տուրքերի խնդիրները Եվրոպայում սահմանափակված են 10%-ով, իսկ ՄՄ-ում դրանք 15%-ից են սկսվում: Խաղի կանոններն իրար հակասում են. եթե դառնանք ՄՄ անդամ, ավտոմատ կերպով կսահմանափակվեն Եվրոպայի հետ աշխատելու մեր հնարավորությունները: Բայց կան ոլորտներ, օրինակ՝ կրթության ոլորտում համագործակցության դաշտ կմնա, նույն տարածաշրջանային համագործակցության ոլորտում կլինի համագործակցության հնարավորություն, բայց լայնամասշտաբ աշխատել անհնար կլինի. դա ավտոմատ սահմանափակվում է ՄՄ անդամակցությամբ»,- նշեց նա:
Վերջինս ասաց, որ այսօր ՀՀ-ն ԵՄ-ին որևէ հստակ խոսք չի ասում ՀՀ-ԵՄ հետագա հարաբերությունների վերաբերյալ, քանի որ պետք է տեսնենք, թե ինչ է իրեն թույլ տալիս Ռուսաստանը:
«Երբ Ռուսաստանն ասի, թե ինչ է թույլ տալիս, կսկսեն խոսել»,- ասաց նա՝ հստակեցնելով, որ դա, ամենայն հավանականությամբ, տեղի կունենա ՄՄ-ին Հայաստանի անդամակցությունից հետո: Նրա խոսքով՝ եթե ձգձգվի այդ անդամակցությունը, ապա կարող են բացել օրակարգը:
Մանրամասները՝ տեսանյութում:
