Պետական այցով Հայաստանում գտնվող Ֆրանսիայի նախագահ Ֆրանսուա Օլանդը երեկ հայ-ֆրանսիական տնտեսական համաժողովում հայտարարել է, որ Հայաստանի համար հնարավոր է մտածել Ասոցացման նոր համաձայնագիր, որը չի խանգարի Հայաստանի՝ Մաքսային միությանն անդամագրվելու ցանկությանը:
«Առաջին լրատվական»-ի հետ զրույցում Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանն ասաց, որ Հայաստանի համար, ըստ երևույթին, կմշակվի նախադեպը չունեցող մոդել, և հավանական է նաև, որ Հայաստանին այդ տարբերակն առաջարկվելուց հետո առաջարկ արվի նաև այլ պետությունների:
«Այդպես հապճեպ չեն կարող անել, պետք է մտածել և ստեղծել այնպիսի պայմանագիր, որ չխանգարի Հայաստանի տնտեսական քաղաքականությանը դեպի Ռուսաստան, Եվրոպայի քաղաքականությանը դեպի Մոսկվա և Հայաստան, և որն էական նշանակություն ունեցող փաստաթուղթ կլինի:
Ես չեմ բացառում նաև, որ այդ պայմանագիրը առաջարկվի ստորագրել ցանկացող այլ պետությունների ևս, սակայն հնարավոր է, որ միայն Հայաստանի համար լինի՝ հատուկ պատճառներով»:
«Բոլորը գիտեն, որ Հայաստանը ճնշումների տակ է, վիճակ չունի, հետո՝ Ֆրանսիայի համար կարևոր է Հայաստանը, որովհետև խաչմերուկ է․․․»
Մեր այն հարցին, թե, իր կարծիքով, ինչո՞ւ է Հայաստանին այդպիսի արտոնություն տրվում, երբ Հայաստանը նախորդ տարվա սեպտեմբերի 3-ին արդեն ընտրել է իր տնտեսական ուղղությունը, և հասարակական դժգոհություն էլ առանձնապես չկա, Կայծ Մինասյանն պատասծանեց․ «Որովհետև, նախ, բոլորը գիտեն, որ Հայաստանը ճնշումների տակ է, վիճակ չունի, հետո՝ Ֆրանսիայի համար կարևոր է Հայաստանը, որովհետև խաչմերուկ է: Եթե վաղը Իրանի հարցը լուծվի, ինքնաբերաբար, Իրանի նավթը և գազը կանցնեն Հայաստանով: Ուրեմն Արևմուտքը Հայաստանի կարիքն ունի, Արևմուտքն ուզում է, որ Հայաստանն ու Վրաստանը Եվրոպայի հետ համագործակցեն լավ պայմաններով»:
Ֆրանսուա Օլանդը, նախքան Հայաստան այցը, կոշտ հայտարարություններ էր արել Ռուսաստանի նախագահ Վլադիմիր Պուտինի հասցեին: Կայծ Մինասյանից հետաքրքրվեցինք՝ արդյո՞ք դա հայ-ֆրանսիական բարիդրացիական հարաբերությունների վրա չի՞ անդրադառնա՝ հաշվի առնելով Հայաստանի ակնհայտ ռուսաստանամետ քաղաքականությունը: Մեր հարցադրմանն ի պատասխան՝ փորձագետն ասաց․ «Անուղղակիորեն՝ այո, հնարավոր է անդրադառնա: Բոլորը գիտեն, թե Հայաստանն ինչ հարաբերություններ ունի Ռուսաստանի հետ, բայց ժամանակն է, որ Հայաստանը ճիշտ տարբերակ գտնի նաև Ֆրանսիայի հետ լավ հարաբերություններ ունենալու համար. Օլանդի նշած պայմանագիրը շատ կարևոր է: Եթե Հայաստանը ցանկություն ունենա այդ պայմանագիրը ստորագրել, կնշանակի հետևյալը՝ Բրյուսելի փոխարեն սկսում է Ֆրանսիայից, հետո հնարավոր է՝ նաև Գերմանիայի հետ, հետո այդ մթնոլորտից օգտվելով վերջնական պայմանագիր կստորագրի՝ քչից սկսելով, վերև բարձրանալով, հասնելով Բրյուսել: Հայաստանը պետք է կարողանա օգտվել այդ հնարավորությունից»,- եզրափակեց մեր զրուցակիցը:
