Վերաքննիչ քրեական դատարանի վարույթում է Ռոման Գրիգորյանի գործով բերված վերաքննիչ բողոքի քննությունը:
Գործը քննվել է Էրեբունի և Նուբարաշեն վարչական շրջանների ընդհանուր իրավասության դատարանում Վարդան Գրիգորյանի նախագահությամբ:
Ըստ դատական ակտի՝ 28-ամյա Ռոման Գրիգորյանը մեղավոր է ճանաչվել խարդախության եղանակով գույք հափշտակելու և ապօրինի թմրամիջոց պահելու համար:
Նախաքննական մարմնի կողմից Ռոման Գրիգորյանին մեղադրանք է առաջադրվել այն բանի համար, որ 2012 թվականի մայիսին «Օդնոկլասնիկի» կայքի միջոցով մտերմացել է նախկինում իր հետ նույն դպրոցում սովորած Մարինեի (անունը փոխված է) հետ:
Ռոմանը տեղեկացել է, որ Մարինեն ամուսնացած է, ապրում է նյութապես ապահով ընտանիքում: Մարինեից գումարներ հափշտակելու դիտավորությամբ սոցիալական կայքի և հեռախոսազանգերի միջոցով Ռոմանը վստահեցրել է, որ սիրում է նրան, չի կարող առանց նրա ապրել:
Կնոջ վստահությունը շահելով՝ Ռոմանը նրանից պարտքով 200 դոլար է խնդրել: Մարինեն հավատացել ու տվել է այդ գումարը: Հետո Ռոմանը Մարինեից 800 դոլար է պարտքով վերցրել: Պարբերաբար ունեցած հանդիպումների ժամանակ նա շարունակել է կնոջը վստահեցնել, թե սիրում է նրան: Մոտ մեկ շաբաթ անց Մարինեից խնդրել է ևս 1500 դոլար:
Այստեղ արդեն կինը զգուշացել է, մերժել ու պահանջել, որ նախկինում վերցրած գումարները վերադարձնի:
Սիրո խոստովանությունների փոխարեն Ռոմանը, ըստ մեղադրանքի, արդեն գումար է պահանջել՝ սպառնալիքներ հնչեցնելով, թե հակառակ դեպքում իրենց ինտիմ հարաբերությունների մասին կպատմի նրա ամուսնուն ու հարազատներին:
Մարինեն վախեցել է, Ռոմանին տվել պահանջած գումարը;
Մեկ շաբաթ անց Ռոմանը նրանից դարձյալ 500 դոլար է պահանջել:
Մարինեն ասել է, թե այլևս գումար չունի, խնդրել է, որ Ռոմանը վերադարձնի վերցրած գումարները:
Ռոմանը պարտքը վերադարձնելու պատրվակով Մարինեին կանչել է հյուրանոցային համալիր, որտեղ նրանք, ըստ մեղադրանքի, փոխադարձ համաձայնությամբ սեռական հարաբերություններ են ունեցել: Կատարվածը շահարկելով՝ Ռոմանը այդ օրը Մարինեից վերցրել է ևս 500 դոլար:
Այնուհետև ձեռնարկատիրական գործունեություն ծավալելու պատրվակով Ռոմանը 2012 թվականի սեպտեմբերին Մարինեից պահանջել ու ստացել է 5 հազար դոլար: Նույն ամսին նույն պատրվակով ու սպառնալիքներով նա Մարինեից ստացել է ևս 7950 դոլար:
Ապա Ռոմանը Մարինեին ասել է, թե ցանկանում է գարեջրատուն բացել, գումար է պահանջել:
Մարինեն փորձել է մերժել: Ռոմանն առաջարկել է, որ նա իրեն հանձնի տանը եղած ոսկեղենը: Դրանք գրավ կդնի, նախկինում վերցրած գումարները կվերադարձնի, հակառակ դեպքում Մարինեի ամուսնուն կպատմի իրենց ինտիմ կապի մասին:
Իր վերաբերյալ արատավորող տեղեկությունների հրապարակման իրական վտանգ զգալով՝ Մարինեն, ըստ մեղադրանքի, 2012 թվականի հոկտեմբերին Ռոմանին է տվել սկեսուրին պատկանող ոսկե զարդերը:
Այսպիսով, ըստ մեղադրանքի, Ռոմանը տիրացել է Մարինեի կողմից տրված ոչ միայն 15 հազար 950 դոլար գումարին, այլև 12 միլիոն դրամ արժողությամբ ոսկե զարդերին:
Ըստ մեղադրանքի՝ Ռոման Գրիգորյանը տուժողին պատճառել է ընդհանուրը՝ 18 միլիոն 491 հազար 650 դրամի գույքային վնաս:
Ռոման Գրիգորյանի տան խուզարկությամբ 2012 թվականի նոյեմբերի 28-ին հայտնաբերվել է 0,53 գրամ քաշով չորացված մարիխուանա:
Նախաքննական մարմինը Ռոման Գրիգորյանին մեղադրանք է առաջադրել շորթման եղանակով տուժողից գումարներ հափշտակելու համար՝ ՀՀ քրեական օրենսգրքի 182 հոդվածի 3-րդ մասի 2-րդ կետով, ինչպես նաև ապօրինի թմրամիջոց պահելու համար՝ 268 հոդվածի 1-ին մասով:
Ընդհանուր իրավասության դատարանում Ռոման Գրիգորյանն իրեն մեղավոր է ճանաչել միայն թմրամիջոցի համար, իսկ շորթման եղանակով գումարներ հափշտակելու մեղադրանքը չի ընդունել:
Ամբաստանյալը հայտնել է, թե Մարինեից գումարները շորթմամբ չի ստացել: Համացանցում Մարինեն ուրիշ լուսանկար էր տեղադրել, ուրիշ անունով էր գրանցվել: Բայց ինքը հեռախոսահամարով պարզել է նրա ով լինելը, իմացել է, որ ամուսին ու երեխաներ ունի:
Ըստ Ռոմանի՝ իրենք ինտիմ հարաբերություններ են ունեցել կնոջ նախաձեռնությամբ: Ինքը ո՛չ սեր է խոստովանել, ո՛չ սպառնալիքներ է տվել: Խոսելու ժամանակ ասել է, թե ուզում է բիզնես ձեռնարկել, բայց գումար չունի, Մարինեն առաջարկել է իր օգնությունը: Նա պարտքով իրեն տվել է ընդհանուրը՝ 5200 դոլար: Այլ գումարներ կամ ոսկեղեն չի վերցրել, բայց երբ իրենք հանդիպել են հյուրանոցներում, Մարինեն լիքը գումարներ է ծախսել, իր համար նվերներ է գնել: 15 հազար դոլար գումար նա իրեն չի տվել, նա գումարներ է ծախսել իր անձնական հաճույքների համար:
Ռոման Գրիգորյանը նշել է, որ Մարինեից պարտքով վերցրած 5200 դոլարից 3 հազար դոլարը արդեն վերադարձրել է նրան, մնացածն էլ կվերադարձնի հնարավորինս սեղմ ժամկետում:
Մարինեի սկեսուրը, ով այս գործով տուժող է ճանաչվել, հայտնել է, որ Մարինեն իր որդու նախկին կինն է հիմա: Նա և իր որդին երկու երեխա ունեն:
Իր տնից կատարված գողության մասին տուժողն իմացել է 2012 թվականի նոյեմբերին, երբ պարզվել է, որ իրենց տանը եղած գաղտնարանները դատարկ են՝ ո՛չ ոսկեղենը կա, ո՛չ հավաքած գումարը:
Որդու հետ որոշել են դիմել ոստիկանություն: Այդ ընթացքում հարսն իրենց ոչինչ չի ասել, նույնիսկ դեմքի արտահայտությունը չի փոխել: Ինքը մտածել է, թե հարսը միգուցե ծնողներին է գումարով օգնել: Պարզելու համար հարսի ծնողներին իրենց տուն է կանչել, բայց նրանք անտեղյակ են եղել:
Միայն քննիչի մոտ հարցաքննվելիս է նախկին հարսը խոստովանել, որ ինքն է վերցրել գումարներն ու ոսկեղենը ու մաս-մաս տվել է Ռոման Գրիգորյանին:
Նախաքննության ընթացքում իրենց տուն են եկել ամբաստանյալի հարազատները, խնդրել են համաձայնության գալ 18 հազար դոլար վերադարձնելու շուրջ: Բայց ինքը չի համաձայնել:
Տուժողը ներկայացրել է 16 միլիոն 490 հազար դրամի քաղաքացիական հայցի պահանջ: Նշել է, որ նախաքննության ընթացքում ամբաստանյալ Ռոման Գրիգորյանն իրեն վերադարձրել է երեք հազար դոլար:
Տուժող է ճանաչված նաև Մարինեն: Նա հայտնել է, որ ամուսնացել է 2005 թվականին, ունի երկու երեխա: Ռոմանին իր հեռախոսահամարը տվել է՝ չցանկանալով, որ նա իր մասին ավելորդ հարցուփորձ անի, ուրիշներից իմանա: Նրա հետ հանդիպել է, որովհետև նա խնդրել է մեկ անգամ հանդիպել ու խոստացել է, որ դրանից հետո էլ չի անհանգստացնի:
Առաջին անգամ հանդիպել են ամուսնու տան հարևանությամբ: Դրանից հետո էլ Ռոմանը սպառնացել է, որ եթե հանդիպման չգա, ամեն բան կպատմի իր ամուսնուն:
2012 թվականի հունիսին ամուսնու ու երեխաների հետ հանգստացել է Դիլիջանում: Ռոմանը հաղորդագրություն է ուղարկել իր հեռախոսին. «Ո՞նց ես, ձայնիդ կարոտել եմ»:
Վախենալով, որ նա կարող է նորից գրել կամ զանգահարել, ինքն է զանգել նրան ու հարցրել, թե ինչո՞ւ է իրեն հաղորդագրություն ուղարկել: Իմանալով, որ ընտանիքով հանգստանում է Դիլիջանում, ասել է. «Լավ էլ օլիգարխ եք, մարդդ «Մերսեդես» ա քշում, թանգ տեղ եք հանգստանում, ուզում եք գնալ Ֆրանսիա…»:
Դրանից հետո Ռոմանը ավելի հաճախ է զանգել, իրենք գաղտնի խոսել են իրար հետ: Ռոմանն ասել է, թե սիրում է իրեն, նշանակություն չի տալիս, որ ինքն ամուսնացած է: Ռոմանը երդվել է ծնողների ու մինուճար քրոջ անունով: Այդպիսի երդումներից հետո Մարինեն ո՞նց կարող էր չհավատալ Ռոմանի «անսահման սիրուն»:
Մարինեն էլ է Ռոմանին սեր խոստովանել: Սկսել են հանդիպել երեխային մանկապարտեզից վերցնելու ճանապարհին: Առաջին անգամ Ռոմանը երկու հարյուր դոլար պարտք է խնդրել մեկ շաբաթով: Ինքը իրենց տան գաղտնարանից վերցրել է այդ գումարը և տվել Ռոմանին: Հետո Ռոմանը շարունակել է սեր խոստովանել ու խնդրել է ևս ութ հարյուր դոլար:
Ինքը նորից իրենց տան գաղտնարանից հանել է այդ գումարը, տվել Ռոմանին: Ամբողջ ընթացքում Ռոմանն առաջարկել է, որ իրենք սեռական հարաբերություններ ունենան, քանի որ սիրում են իրար: Ինքը հրաժարվել է:
Հետո էլի գումար է տվել, երբ նա սպառնացել է հայտնել ամուսնուն: Իսկ հետո նա կանչել է, որ մի բաժակ սուրճ խմեն, ու վերադարձնի վերցրած գումարները:
«Սուրճ խմելու համար» հանդիպել են Էրեբունու տարածքի ինչ-որ հյուրանոցում, այնտեղ իրար հետ սեռական հարաբերություն են ունեցել, որից հետո Ռոմանը սպառնացել է, թե դրա մասին կհայտնի իր ամուսնուն, եթե հինգ հարյուր դոլար չտա…
Հետո էլի գումար է տվել, հետո իրենց տան ոսկեղենն է պահանջել: Ռոմանն ասել է, թե «կրվել է, պիտի գումարը տա», հակառակ դեպքում կսպանեն: Ըստ Մարինեի՝ Ռոմանը սպառնացել է, որ եթե ոսկեղենը չտա, իրեն կտանի ու գումարի դիմաց «ստավկա կանի»: Տեսնելով, որ չի կարողանում ազատվել Ռոմանից՝ խոստացել է կատարել նրա պահանջը…
Երբ սկեսուրը բացահայտել է գումարների ու ոսկեղենի կորուստը և դիմել է ոստիկանություն, ինքը ոստիկանությունում ճիշտ ցուցմունք է տվել ու այլևս ամուսնու տուն չի վերադարձել:
Մարինեն ասել է, թե իր ընտանեկան կյանքը շատ լավ էր դասավորված, ինքը չի ցանկացել կորցնել ընտանիքը, բայց չհասկանալով, թե ինչ է անում, հանդիպել է Ռոմանի հետ…
Իր ոսկե զարդերի մասով Մարինեն Ռոմանին քաղհայցի պահանջ չի ներկայացրել…
Ընդհանուր իրավասության դատարանը եզրակացրել է, թե մեղադրանքի ձևակերպման մեջ նախաքննական մարմինը «լողացել է» երկու հանցակազմերում՝ շորթում ու խարդախություն, և արդյունքում սխալ է որակել Ռոման Գրիգորյանի արարքը: Դատարանն արժանահավատ է գնահատել տուժող Մարինեի սկզբնական ցուցմունքը, որտեղ նա մանրամասն նշել է Ռոմանին գումարներ ու ոսկե զարդեր տալու իրական հանգամանքների մասին՝ ոչինչ չասելով սպառնալիքների կամ շորթման վերաբերյալ: Դրանց մասին նա սկսել է խոսել հետագա ցուցմունքներում: Դատարանի եզրահանգմամբ՝ այդ կերպ Մարինեն փորձել է խուսափել ենթադրյալ քրեական պատասխանատվությունից կամ սկեսուրի նկատմամբ հնարավոր գույքային պատասխանատվությունից:
Դատարանը նշել է, որ դատաքննության ընթացքում ևս տուժող Մարինեն «բազմիցս չհաջողված փորձեր է կատարել դատարանին իրականությունից շեղելու, որոշակի փաստական հանգամանքներ սխալ ներկայացնելու համար, սակայն դրանք հերքվել են… ապացույցների ամբողջությամբ»:
Դատարանը եզրակացրել է, որ Ռոման Գրիգորյանը գույքի հափշտակությունը կատարել է խարդախության եղանակով: «Սիրո խոստովանություններ կատարելով, ամուսնու առկայության պայմաններում անմնացորդ նվիրվելով տուժողին ու նրա հետ գտնվելով ինտիմ հարաբերությունների մեջ՝ Ռոման Գրիգորյանը ձեռք է բերել տուժողի վստահությունը, հետագա վեց ամիսների ընթացքում չարաշահել այն…»:
Ընդհանուր իրավասության դատարանը Ռոման Գրիգորյանին մեղավոր է ճանաչել խարդախության և ապօրինի թմրամիջոց պահելու համար՝ ՀՀ քրեական օրենսգրքի 178 հոդվածի 3-րդ մասի 1-ին կետով և 268 հոդվածի 1-ին մասով:
Ռոման Գրիգորյանը վերջին հաշվով դատապարտվել է 5 տարի 6 ամիս ազատազրկման՝ անձնական գույքի բռնագրավմամբ, բայց ոչ ավելի, քան՝16 միլիոն 490 հազար դրամի չափով:
Ռոման Գրիգորյանը կալանքի տակ է առնվել դատարանի դահլիճում:
Հօգուտ Մարինեի տուժած սկեսրոջ՝ Ռոման Գրիգորյանից կբռնագանձվի 16 միլիոն 490 հազար դրամ՝ որպես հանցագործությամբ տուժողին պատճառված գույքային վնասի հատուցում:
Այս դատավճռի դեմ վերաքննիչ բողոքներ են բերել Ռոման Գրիգորյանի շահերի պաշտպանը և մեղադրողը:
Պաշտպանական կողմի կարծիքով՝ վերաքննիչ քրեական դատարանը կամ պետք է բեկանի դատավճիռը, Ռոման Գրիգորյանի գործի վարույթը կարճի, կամ գործը պետք է ուղարկի ստորադաս դատարան՝ նոր քննության:
Մեղադրանքի կողմի կարծիքով՝ Ռոման Գրիգորյանի կատարածը շորթում է եղել, ինչի համար էլ նա պիտի մեղավոր ճանաչվի ու դատապարտվի ազատազրկման…