«Կուբան»-ի ֆուտբոլիստ, չեռնոգորիացի Նիկոլա Նիկեժիչը բաց նամակով դիմել է ՖԻՖԱ-ի և ՈՒԵՖԱ-ի ղեկավարներ Զեպ Բլատտերին և Միշել Պլատինիին, որպեսզի վերջիններս պատժամիջոցներ կիրառեն իր նախկին ակումբ «Կուբան»-ի դեմ, որի նախագահը Կրասնոդարի շրջանի նահանգապետ Ալեքսանդր Տկաչովն է: Նիկեժիչի նամակից հետևում է, որ ֆուտբոլիստին ուժի միջոցով, զենքի սպառնալիքի տակ ստիպել են չեղյալ համարել ակումբի հետ կնքած՝ դեռևս մեկ տարի ուժի մեջ եղող պայմանագիրը:
2010 թվականի մարտի 10-ին Նիկեժիչը ռուսական ակումբի հետ երկու տարվա պայմանագիր է կնքել, սակայն, ֆուտբոլիստի խոսքերով, այս ձմռանը ակումբը հայտնել է, որ այլևս նրա կարիքը չունի: «Ինձ առաջարկեցին խզել պայմանագիրը, բայց ես չհամաձայնեցի»,- Նիկեժիչի նամակից մեջբերում է Коммерсант-ը:
Ֆուտբոլիստը պատմում է, որ 2011 թվականի մարտի 7-ին «Կուբան»-ի մարզիչ Նիկոլայ Խլիստունովն առաջարկել է գնալ մարզաբազայում գտնվող իր գրասենյակ, որտեղ ֆուտբոլիստին միայնակ է թողել երկու «լավ մարզված տղամարդկանց» հետ: Վերջիններս Նիկոլայից պահանջել են ստորագրել ինչ-որ փաստաթուղթ: Առաջին անգամ բացասական պատասխան ստանալուց հետո նրանցից մեկը հարվածել է ֆուտբոլիստին և կրկնել իր պահանջը: Հերթական անգամ մերժվելուց հետո երկրորդ տղամարդը հանել է բաճկոնը, որի տակ երկու ատրճանակ է եղել, իսկ առաջինն այդ ընթացքում շարունակել է հարվածել, այնուհետև գետնին տապալելուց հետո նրանք երկուսով շարունակել են ծեծել ու խեղդել Նիկեժիչին:
«Այդ ամենը տևեց մոտ 20 րոպե, որից հետո ես վերջնականապես ուժասպառ եղած և կյանքիս համար վախեցած՝ ստորագրեցի ինձ անծանոթ թղթերը», – պատմում է ֆուտբոլիստը:
«Կուբան»-ի մամուլի քարտուղար Վյաչեսլավ Իվանովն անհավանական է համարել ֆուտբոլիստի պատմությունը: Կրասնոդարի շրջանի նահանգապետ Ալեքսանդր Տկաչովի մամուլի խոսնակ Վլադիմիր Պրիգոդան ասել է, որ իրեն ծեծի հետ կապված ոչինչ հայտնի չէ, իսկ ակումբի գլխավոր տնօրեն Սուրեն Մկրտչյանը երեկ ամբողջ օրը չի պատասխանել Коммерсант-ի զանգերին:
