«Երկիր» միության և «Կովկաս ինստիտուտ» հիմնադրամի նախաձեռնությամբ, այսօր Կոնգրես հյուրանոցում տեղի ունեցավ «Հայոց ցեղասպանության գիտակցման կառուցումը Թուրքիայում» թեմայով միջազգային գիտաժողով:
Միջոցառման բացման խոսքում «Կովկաս ինստիտուտի» տնօրեն Ալեքսանդր Իսկանդարյանը ողջունեց բոլոր մասնակիցներին: Իսկանդարյանի խոսքով, տարիներ առաջ հնարավոր չէր անգամ պատկերացնել, որ նման միջազգային գիտաժողով կարող է կազմակերպվել, և որ դրան կմասնակցեն նաև թուրք փորձագետները:
«Երկիր» միության ծրագրերի համակարգող Ռոբերտ Թաթոյանի խոսքով, Հայոց ցեղասպանության ճանաչումը Թուրքիայույմ ավելի հրատապ է դարձել հայ-թուրքական արձանագրությունների ստորագրումից հետո: Բանախոսի գնահատմամբ, չի կարող լինել որևէ հարաբերություն ոճրագործի և զոհի միջև, քանի դեռ առաջինը չի ընդունել անցյալը:
«Հայոց ցեղասպանության գիտակցման կառուցումը Թուրքիայում» միջոցառմանը զեկույցներով հանդես եկան թուրք փորձագետներ, «Ներման արշավի» նախաձեռնող խմբի անդամներ Չենգիզ Ակթարը և Ալի Բայրամօղլուն, ինչպես նաև հայ թուրքագետներ Ռուբեն Մելքոնյանը, Դավիթ Հովհաննիսյանը և քաղաքագետ Ռիչարդ Կիրակոսյանը: Զեկույցները քննարկեցին թուրք հասարակության և պետության կողմից Հայոց Ցեղասպանության ճանաչման հեռանկարները: Գիտաժողովի ընթացքում ներկայացվեց նաև Չենգիզ Ակաթարի «Կոչ ներումի» գրքի հայերեն թարգմանությունը:
