Այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում քննվող Արգիշտի Կիվիրյանի գործով դատական նիստը հետաձգվեց, քանի որ գործով ծանուցված վկաներից և ոչ մեկը չէր ներկայացել դատարան: Վկաներից մեկի կապակցությամբ էլ հարևանները հայտնել էին, որ այդ հասցեում ընդհանրապես մարդ չի բնակվում:
«Այստեղից հարց է ծագում, թե նախաքննական մարմինը որտեղի՞ց է պեղել, գտել այդ վկային, և հիմա փորձում են թաքցնել այդ մարդուն: Հարց է ծագում, թե հատուկ քննչական ծառայության քննիչ Լյովա Մելքոնյանը որտեղի՞ց է պեղել այդ վկային, որտեղի՞ց է ի հայտ եկել այդ վկան»,- «Առաջին լրատվական»-ի հետ զրույցում ասաց Արգիշտի Կիվիրյանը:
Վերջինիս խոսքով՝ այս ամենը ցույց է տալիս, որ այս գործը անհիմն, հորինված գործ է: «Դատաքննության ընթացքում բացահայտվեց այն, ինչի մասին մենք բազմաթիվ անգամ նշում էինք՝ այս գործը փուչիկ է: Քրեական գործ, որպես այդպիսին, չկա: Դա ակնհայտ է: Բայց ակնհայտ է նաև, որ դատարանը կատարելու է այն պատվերը, որը կստանա վերևից»:
Հիշեցնենք, որ Արգիշտի Կիվիրյանը մեղադրվում է իշխանության ներկայացուցչի նկատմամբ առողջության համար ոչ վտանգավոր բռնություն կատարելու մեջ:
Գործով հաջորդ նիստը նշանակված է մայիսի 22-ին, ժամը 15:30-ին: