Կոտայքի մարզի ընդհանուր իրավասության դատարանում Մխիթար Պապոյանի նախագահությամբ ավարտվել է Գարեգին Պ.-ի գործի դատական քննությունը:
35-ամյա Գարեգինը վարորդ-առաքիչ է: Ամուսնացած է:
Ըստ դատական ակտի՝ 2013 թվականի հոկտեմբերի 12-ին, ժամը 15-ի սահմաններում Երևան-Սևան ավտոճանապարհի «Թեյարան» կոչվող հատվածում Գարեգինը իր վարած «ՎԱԶ-2107» մակնիշի ավտոմեքենայի մեջ կոնյակ է հյուրասիրել Երևան քաղաքի բնակչուհի, 2000 թվականի մայիսի 5-ին ծնված 13-ամյա մի աղջկա:
Կոնյակից հետո Գարեգինը համբուրել է տասներեք տարեկան աղջկա շուրթերը, ձեռքերով շոյել կուրծքը, հեշտոցը…
Աղջիկը կարողացել է թույլ չտալ, որ Գարեգինը շարունակի գործողությունները: Գարեգինը, ըստ դատական ակտի, զայրացել է, քիչ առաջ շոյող ձեռքով դիտավորությամբ հարվածել է աղջկա մարմնի տարբեր մասերին՝ պատճառելով ֆիզիկական ցավ:
Գարեգին Պ.-ին մեղադրանք է առաջադրվել 16 տարին չբոլորած անձի հետ սեքսուալ գործողություն կատարելու, նրա նկատմամբ բռնություն գործադրելու համար՝ ՀՀ քրեական օրենսգրքի 141 և 118 հոդվածներով:
Ընդհանուր իրավասության դատարանում ամբաստանյալն իրեն լիովին մեղավոր է ճանաչել և միջնորդել, որ գործը քննվի արագացված ընթացակարգով:
Դեռահասի հետ սեքսուալ գործողություն կատարած Գարեգինը մինչև 14 տարեկան 3 դուստրերի հայր է:
Ընդ որում՝ Գարեգինի ավագ դուստրը հենց նրա գործողություններից տուժած աղջնակի տարեկիցն է՝ ծնվել է 2000 թվականի հունվարի 15-ին:
Գարեգինի միջնեկ դուստրը 9 տարեկան է, իսկ կրտսերը՝ 3 ամսական, ծնվել է 2013 թվականի հունիսի 6-ին:
Երեք մանկահասակ երեխաների առկայությունը Գարեգինի խնամքին համարվել է մեղմացնող հանգամանք:
Գարեգինը դրական բնութագրեր է ներկայացրել, որոնք դատարանը նույնպես հաշվի է առել:
Անչափահաս տուժողի օրինական ներկայացուցիչը Գարեգինից պահանջել է 96 հազար դրամ՝ որպես հանցագործությամբ պատճառված վնասի հատուցում:
Ընդհանուր իրավասության դատարանը մեղսագրված արարքների համար մեղավոր է ճանաչել Գարեգին Պ.-ին ու վերջին հաշվով դատապարտել 250 հազար դրամ տուգանքի: Հօգուտ տուժողի Գարեգինից կբռնագանձվի 96 հազար դրամ: