Երեկ Սանկտ Պետերբուրգի դատարանը 12 տարվա ազատազրկման է դատապարտել Հայաստանի Հանրապետության քաղաքացի Արա Հարությունյանին: Նա մեղավոր է ճանաչվել 2009 թ. հոկտեմբերին երթուղային տաքսում երկու ուղևորի դանակով հարվածելու համար: Հայտնի է, որ տուժածներից մեկը մինչև հիմա գտնվում է կոմայի մեջ:
Հարությունյանը Սմիռնովին և Շիպկովին դանակահարել է այն ժամանակ, երբ նրանցից մեկը խմած վիճակում գլուխը դրել է Հարությունյանի ընկերուհու ծնկներին: Երբ Սմիռնովին նկատողություն է արվել, սկսվել է կռիվը, որն ավարտվել է դանակահարությամբ:
Թեպետ Հարությունյանը և նրա փաստաբանները պնդել են, որ հանցագործությունը կատարվել է ազգային անհանդուրժողականության հողի վրա, իսկ ինքը` Հարությունյանը եղել է աֆեկտի վիճակում, դատարանն այդ փաստերը չընդունեց և բավական խիստ պատիժ սահմանեց:
Դատավորը մի քանի անգամ ընդմիջել է դատական նիստը, քանի որ Հարությունյանի բազմաթիվ բարեկամները, որոնք հավաքված են եղել դատարանի դահլիճում, աղմուկ են բարձրացրել` բողոքելով անարդարացի որոշման դեմ: Այս մասին հաղորդում է 100tv.ru կայքը: