Թուրքական Zaman թերթի հաղորդմամբ, վարչապետ Ռեջեփ Էրդողանն այսօր Ռուսաստան կատարելիք այցից առաջ հարցազրույց է տվել
ИТАР-ТАСС գործակալությանը, որում անդրադարձել է ռուս-թուրքական հարաբերություններին.
«Մենք մեծ կարևորություն ենք տալիս Ռուսաստանի հետ ջերմ հարաբերությունների պահպանմանը: Երկու երկրների միջև հաստատվել են շատ անկեղծ հարաբերություններ: Գնալով՝ այդ հարաբերություններն առավել սերտանում են ու ամրագրվում:
Մոսկվայում մենք պատրաստվում ենք քննարկել միջուկային էներգիայի ոլորտում համագործակցության, ինչպես նաև տնտեսական ու առևտրային ոլորտներին առնչվող խնդիրները: Բնականաբար, խոսք է լինելու նաև պաշտպանական ոլորտում համագործակցության մասին:
Մենք պատրաստ ենք լիովին վերացնել Ռուսաստանի հետ գործող վիզային ռեժիմը: Թուրքիան ու Ռուսաստանը պետք է շտապեն այս հարցում: Դրա շնորհիվ էլ ավելի կմեծանա Թուրքիա այցելող ռուս զբոսաշրջիկների ներհոսքը, ինչն, առանց դրա էլ, գնալով աճում է»:
Հիշեցնենք, որ ներկայումս տարեկան Թուրքիա է այցելում 3-4 միլիոն ռուս զբոսաշրջիկ: Եգիպտոսում և, ընդհանրապես, արաբական աշխարհում տիրող անկայուն քաղաքական իրավիճակը նպաստում է Թուրքիայի զբոսաշրջության ոլորտի ծաղկմանը:
