«Բոլոր սլաքներն ուղղում են հայերի դեմ, ինչ-որ բան է կատարվում, հայերի գլխին ինչ-որ բան են սարքում»,- «Առաջին լրատվական»-ի հետ զրույցում նման մտահոգություն հայտնեց ԼՂՀ ինքնապաշտպանական ուժերի առաջին հրամանատար Արկադի Կարապետյանը:
Նա անդրադարձավ նաև Կալիֆոռնիա նահանգի կողմից ԼՂՀ անկախության ճանաչմանը և ընդգծեց. «Бесплатный сыр бывает только в мышеловке»:
«Մեզ ներքաշում են ինչ-որ խաղի մեջ, ուկրաինական դեպքերն էլ՝ մեր վրա են ուզում սլաքներն ուղղել, ՆԳ նախարար են դրել Արսեն Ավակովին՝ հայի, որպեսզի երկու կողմն էլ կատաղի: Ինչ-որ գործընթաց է կատարվում, որն առայժմ ինձ համար անորոշ է, ինչ-որ բան այն չէ»,- ասաց հրամանատարը:
Մեր խնդրանքով Արկադի Կարապետյանն անդրադարձավ նաև ԵԱՀԿ Մինսկի ամերիկացի համանախագահ Ջեյմս Ուորլիքի՝ Ղարաբաղյան հիմնահարցի վերաբերյալ վերջին հայտարարությանը և ասաց. «Նա ոչ առաջինն է, ոչ վերջինը, բայց ամեն Ուորլիքի ասածով մենք չպետք է առաջ շարժվենք: Ինձ թվում է՝ Մինսկի խումբը իրեն սպառել է, նա այն գլխից էլ իրեն սպառած էր՝ սկսած խաղի մեջ մտնելու առաջին պահից:
Ես այն մարդկանցից չեմ, որ որևէ մեկի աշխատանքը թերագնահատի, բայց ես այլ բան եմ ասում՝ ինչ-որ բան են ստեղծել ու խաղ են խաղում և ոչ՝ մեր օգտին, ինչ-որ բան են անում. ժամանակ են ձգում, մեզ թուլացնում»,- կարծում է հրամանատարը:
Լուսանկարը՝ Mediamax-ի
