Շիրակի մարզի ընդհանուր իրավասության դատարանում Հարություն Մովսեսյանի նախագահությամբ ընթանում է Ռոբերտ Գևորգյանի գործի դատական քննությունը:
52-ամյա Ռոբերտ Գևորգյանը «Հայ-կազակական միջազգային միություն» հասարակական կազմակերպության Շիրակի մարզի առաջին ստորաբաժանման ավագ սպա է:
Ըստ առաջադրված մեղադրանքի՝ ավագ սպա Ռոբերտ Գևորգյանը նախնական համաձայնության է եկել նույն կազմակերպության մասնակից՝ ատաման Ա. Գրիգորյանի հետ:
Նրանք ՀՀ ԱԱԾ սահմանապահ զորքերում ծառայության անցնելու համար, իբր՝ օրենքով նախատեսված պարտադիր վճարումներ կատարելու պատրվակով, 2012-2013 թվականների ընթացքում մի շարք քաղաքացիներից խարդախության եղանակով պահանջել ու հափշտակել են 1 միլիոն 205 հազար 120 դրամ գումար:
Տուժողները, ըստ դատական տեղեկատվական համակարգի, 14-ն են:
Ռոբերտ Գևորգյանին մեղադրանք է առաջադրվել խարդախության համար՝ ՀՀ քրեական օրենսգրքի 178 հոդվածի 2-րդ մասի 1.2 կետով:
Գևորգյանի խափանման միջոցը ստորագրությունն է չհեռանալու մասին: