Օդեսայի դեպքերը Սումգայիթի կրկնությունն են: Այս մասին այսօր լրագրողների հետ զրույցում տեղեկացրեց Հայաստանի աշխարհաքաղաքական ակումբի ղեկավար Արման Բոշյանը՝ խոսելով ուկրաինական զարգացումների շուրջ:
Նա նշեց, որ հայ ժողովուրդը խաղաղասեր ժողովուրդ է, մի ժողովուրդ, որը 1915թ. տեսել է ցեղասպանություն, որը մասնակցել է Հայրենական մեծ պատերազմին և հասել է մինչև Բեռլին, որը տեսել է ադրբեջանական ֆաշիզմ, և այդ ֆաշիզմի գաղափարախոսությունը մենք մինչ այսօր զգում ենք, որը 1988թ. տեսել է Սումգայիթ:
«Սումգայիթում մարդկանց ինչո՞ւ են սպանել. սպանել են նրա համար, որ հայ են, այլ կարծիք ունեն, այլ կրոն ունեն, այլ գաղափարախոսություն ունեն: Օդեսայում ինչո՞ւ են մարդկանց վառել, հղի կնոջն ինչո՞ւ են սպանել, որովհետև այդ մարդիկ այլ գաղափարախոսություն ունեն, այլ մտքեր են արտահայտում, նրանք զինված չէին, առավել ևս, եթե բոլոր տեսանյութերը վերլուծենք, կտեսնենք, որ Օդեսայի դեպքերը Սումգայիթի դեպքերի կրկնությունն են»,- ասաց նա՝ հավելելով, որ Ուկրաինայում վերածնվել է ֆաշիզմը, իսկ այն պետք է ջարդի Ուկրաինայի ժողովուրդը:
Հարցին՝ ինչո՞ւ են նմանատիպ ակցիաներ կազմակերպում, որով Հայաստանին խառնում են Ուկրաինայի ներքին խնդիրներին, Բոշյանը պատասխանեց, որ չեն կարող չարձագանքել այն դեպքերին, որոնք Սումգայիթի դեպքերի կրկնությունն են, որին մենք ականատես ենք եղել 1988թ.: «Դուք արդյոք տեղյա՞կ եք, որ հայերին այնտեղ հետապնդում են: Մեր կազմակերպությունն այնտեղ ունի բավականին շատ համախոհներ, մարդկանց տները վառում են, հայերին գտնում են, դռների վրա նշումներ են անում»,- ասաց նա՝ հավելելով, որ հայ համայնքը փորձում է չեզոք դիրք գրավել, ուստի նման տեղեկությունը ճշտելը բարդ է:
Մանրամասները՝ տեսանյութում:
