Սյունիքի մարզի Գորիս քաղաքում հունիսի 9-ին համայնքի ղեկավարի ընտրություններ են սպասվում: Գորիսը քաղաքապետ է ընտրելու: Մայիսի 9-ին լրանում է թեկնածուների առաջադրման ժամկետը: Քաղաքապետի պաշտոնի համար պայքարող թեկնածուները դեռ չորսն են` «Գորիսի Գամմա» ԲԲԸ գործադիր տնօրեն Տիգրան Կարապետյանը, Գորիս համայնքի ավագանու անդամ, «Շանի» ՍՊԸ տնօրեն Հրայր Յոլյանը, ՀՀԿ անդամ Արա Բուդաղյանը (Ավետիք Բուդաղյանի եղբայրը), «Հայջրմուղկոյուղի» ՓԲԸ Գորիսի տեղամասի պետ Վաչագան Ադունցը: «Առաջին լրատվական»-ը զրուցել է քաղաքապետի թեկնածու Տիգրան Կարապետյանի հետ:
– Պարոն Կարապետյան, Ձեզ ներկայացնում են իբրև Սյունիքի մարզպետ Վահե Հակոբյանի թեկնածու:
– Նախ` շրջանառվում է, որովհետև մենք Սյունիքի մարզպետի հետ ընկերներ ենք, այսքանը:
– Ներկայում չորս թեկնածու կա, նրանցից մեկը` Արա Բուդաղյանն, ըստ լուրերի, պատրաստվում է հանել իր թեկնածությունը` հօգուտ Ձեզ:
– Ճիշտն ասած` էս պահին ես նման ինֆորմացիա չունեմ, նման տեղեկության չեմ տիրապետում:
– Ձեր մրցակիցների շանսերն ինչպե՞ս եք գնահատում:
– Գնահատելն անշնորհակալ գործ է: Ես, որպես թեկնածու, իրավունք չունեմ գնահատելու, չեմ կարծում, որ ճիշտ է: Ցանկացած մարդ, եթե մտել է ընտրապայքարի մեջ, վստահ է իր ուժերի վրա, կարծում եմ` այսքանը: Ես վստահ եմ իմ ուժերի վրա, վստահ եմ, որ իմ համաքաղաքացիների ձայնը կստանամ:
– Ու՞մ եք Ձեզ մրցակից համարում:
– Բոլորին:
– Ամեն դեպքում, մրցակիցների մեջ կա ՀՀԿ կողմից առաջադրված թեկնածու…
– Մենք երկու հանրապետական թեկնածու ունենք` Արայիկ Բուդաղյանն ու Վաչագան Ադունցը:
– Նկատի ունեի Վաչագան Ադունցին, ում մասին ասում են` Սուրիկ Խաչատրյանի թեկնածուն է, դժվար չի՞ լինի իր հետ մրցակցելը:
– Ես չեմ ուզում որևէ մեկին թերագնահատել, չեմ ցանկանում մեկնաբանել այդ հարցը:
– Դուք ինքնառաջադրվա՞ծ եք:
– Այո:
– Կուսակցակա՞ն եք:
– Անկուսակցական եմ:
– Ի՞նչը ձեզ դրդեց մասնակցել այս ընտրապայքարին:
– Վստահությունն իմ ուժերի և իմ թիմի վրա, որ Գորիսի առջև ծառացած հիմնախնդիրները կարող ենք լուծել, մեր ծրագիրը, որ պիտի ներկայացնենք հանրության դատին:
– Հրատապ լուծման ենթակա ի՞նչ խնդիրներ կան, որ ընդգրկել եք Ձեր ծրագրում:
– Մենք մեր ծրագիրն արդեն գրանցումից հետո կհրապարակենք, խոստանում եմ` մեր ծրագրից մեկ օրինակ անպայման տրամադրել ձեզ:
– Քարոզարշավն ի՞նչ կերպ եք անցկացնելու, արդեն ծրագրե՞լ եք:
– Քարոզարշավին բնորոշ բոլոր ձևերով` հանդիպումներ, ելույթներ, գովազդ, ամբողջ գործիքակազմն օգտագործելու եմ:
– Ասում են` Գորիսի հանրության ֆավորիտ թեկնածուն Դուք եք, դա փոքր-ինչ ավելի վստահություն չի՞ տալիս Ձեզ:
– Իհարկե, ոչ թե հենց դա` ձեր ասածը, այլ վստահություն տվել է, որ առաջադրվել եմ. կա որոշակի համակրանք: Այո, իհարկե, էդ վստահությունն է ստիպել, որ առաջադրվեմ:
– Հնարավո՞ր է` ընտրապայքարից հրաժարվեք:
– Ոչ:
