Թուրքական Vatan թերթը, վկայակոչելով կիպրական Politis թերթը, նշում է, որ Թուրքիայի վարչապետ Ռեջեփ Էրդողանը պատրաստել է կիպրական խնդրի կարգավորման նոր` B պլանը.
«Էրդողանն այդ պլանին ձեռնամուխ է լինելու հունիսի 12-ին կայանալիք խորհրդարանական ընտրություններից հետո: Պլանի համաձայն, ինքնահռչակ Հյուսիսային Կիպրոսի թուրքական հանրապետության (ՀԿԹՀ) նավահանգիստները հայտնվելու են ՄԱԿ-ի կամ ԵՄ-ի վերահսկողության ներքո, իսկ Թուրքիան իր հերթին սեփական նավահանգիստները և օդանավակայանները բացելու է կիպրոսցի հույների առջև:
Նշվում է, որ Էրդողանի այս նոր պլանն աջակցություն կգտնի Կիպրոսի Հանրապետության ու ԵՄ-ի մոտ, ինչն էլ կնպաստի ԵՄ-ին Թուրքիայի անդամակցության գործընթացին: Անգամ չի բացառվում, որ Էրդողանի B պլանով, ՀԿԹՀ-ին շնորհվի թուրքական նահանգի կարգավիճակ:
Միևնույն ժամանակ մինչև խորհրդարանական ընտրությունները չպետք է ակնկալել, թե Էրդողանը որևէ քայլ կձեռնարկի կիպրական խնդրի կարգավորման ուղղությամբ»:
Հիշեցնենք, որ կիպրական խնդիրը շարունակում է չլուծված մնալ 1974 թվականից, երբ այնտեղ ներխուժեցին թուրքական զորքերն ու գրավեցին Կիպրոսի տարածքի 37 տոկոսը (3355 քառակուսի կիլոմետր), ինչը թուրքական կողմն անվանում է «Խաղաղության շարժում»:
Արդեն մի քանի տարի է, ինչ Թուրքիան չի կատարում ԵՄ-ի առջև ստանձնած պարտավորությունները` սեփական նավահանգիստներն ու օդանավակայանները չբացելով Կիպրոսի առջև, ինչի համար էլ արգելակել է ԵՄ-ին Թուրքիայի անդամակցության գործընթացը:
Ի դեպ, ողջ աշխարհում միայն Թուրքիան է ճանաչել ՀԿԹՀ-ի անկախությունը, իսկ Ադրբեջանը Լեռնային Ղարաբաղի պատճառով զրկված է այդ գայթակղությունից:
