Ռուսաստանի դեսպան Վոլինկինը հայտարարել է, որ հետ չի վերցնում իր խոսքերը, որոնք հարուցել էին հայաստանյան հանրության դժգոհությունը: Վոլինկինը մի քանի օր առաջ հայտարարել էր, որ Հայաստանում Ռուսաստանը պետք է տեղեկատվական դաշտում ավելի ակտիվ հայտարարի իր մասին, ինչպես նաև Հայաստանին խորհուրդ էր տվել Ռուսաստանի նման լուծել ՀԿ-ների հարցերը, որոնք սեպ են խրում հայ-ռուսական բարեկամության մեջ:
Եվ ահա, Վոլինկինը երեկ Հաղթանակ զբոսայգում տեղի ունեցած տոնական միջոցառմանը հայտարարել է, որ չի պատրաստվում հետ վերցնել իր խոսքերը, իսկ այն, ինչ ինքն ասում է, ամեն ոք կարող է իր ուզածի պես մեկնաբանել: Այլ կերպ ասած՝ Ռուսաստանի դեսպանը Հայաստանի հանրությանն ասում է՝ ինչպես ուզում եք, այնպես էլ հասկացեք, իսկ ես մնում եմ իմ ասածին: Մի պահ թվում է, թե դեսպանն ընդամենը ասում է, որ իրեն սխալ են հասկացել: Բայց Վոլինկինը չի ասում, թե գիտեք, դուք ինձ սխալ եք հասկացել, ես Հայաստանին որևէ ցուցում չեմ տալիս կամ որևէ բան չեմ հորդորում ՀԿ-ների հանդեպ քաղաքականության մասով: Դեսպան Վոլինկինն ասում է ընդամենը, որ իր խոսքերի տերն է, որոնք էլ ով ինչպես ուզում է կարող է հասկանալ ու մեկնաբանել:
Այսինքն՝ Ռուսաստանի դեսպանն ուղղակիորեն վերահաստատում է, որ թքած ունի հասարակության կարծիքի վրա և նրան չի հետաքրքրում, թե ով ինչպես կընկալի իր խոսքերը Հայաստանում, այսինքն՝ ապտակելով մի այտին, հիմա էլ մյուսին է ապտակում: Սակայն այլ բան սպասել էլ պետք չէր, համենայնդեպս՝ այն արձագանքներից հետո, որ տվել է պաշտոնական Երևանը:
Ի՞նչ էր հայտարարել պաշտոնական Երևանն այս կապակցությամբ: Նա հայտարարել էր ընդամենը, որ որևէ ՀԿ չի կարող սեպ խրել հայ-ռուսական դարավոր բարեկամության մեջ: Այսինքն՝ Հայաստանի իշխանությունները ոչ թե Վոլինկինին ասում են, թե պարոն, քո ինչ գործն է, թե մենք ինչ քաղաքականություն կվարենք ՀԿ-ների հարցով, դա մեր երկրի ներքին գործն է, այլ ընդամենը ասում են Վոլինկինին, որ Հայաստանում այդպիսի ՀԿ չկա, այսինքն՝ պատժի առարկա ՀԿ չկա: Այլ կերպ ասած՝ սա անդրադարձ չէ, սա ուղղակի հաշվետվություն է Վոլինկինին, որ պարոն դեսպան, ոչ մի ՀԿ չկա, որ սեպ է խրում, հետևաբար և կարիք չկա որևէ մեկին պատժելու: Այսինքն՝ հաշվետվություն է, թե ինչու չեն պատժում որևէ ՀԿ-ի:
Ահա ամենը, և այս ամենից հետո, եթե Վոլինկինը հաստատում է իր խոսքերն ու ասում, որ ոչ մի բան էլ հետ չի վերցնի, ապա դա պետք է նույնիսկ չարյաց փոքրագույնը համարել: Որովհետև Վոլինկինն, ըստ էության, կարող էր պարզապես պատասխանել Հայաստանի իշխանությունների պատասխանին այլ կերպ և մատնացույց աներ կոնկրետ ՀԿ-ների: Թեև միգուցե Վոլինկինն արդեն իսկ զբաղվել է դրանով, պարզապես մատնացույց է արել ոչ հրապարակավ: