Իշխանության ուղղորդմամբ ուժային կառույցների կողմից «Ժառանգություն» կուսակցության դեմ ծավալվող քրեականացված հետապնդումները ակնհայտ դարձրին, որ կուսակցությունը, այլ ընդդիմադիր գործընկերների և քաղաքացիական հասարակության հետ ընդհուպ մոտեցել է իշխանության համար խիստ վտանգավոր եզրագծին: Իր սպասարկու ԶԼՄ-ների և համազգեստավոր (նաև` քաղաքացիական հագնված) օրինազանցների միջոցով նոր որակի հանցավոր արշավ սանձազերծելով «Ժառանգության» դեմ` իշխանությունը տակավին հույս ունի հետաձգել անխուսափելին, որն այլևս օրախնդիր հրամայական է, համահանրապետական կենսակոչման պահանջ:
Մարտի 3-ին Հանրապետության հրապարակի հայտնի դեպքերից հետո, որի ժամանակ «Ժառանգության» պատգամավորները մի խումբ քաղաքացիների հետ փորձում էին ՀՀ Սահմանադրությունը և օրենքները պաշտպանել իրավապահի համազգեստով անձանց ոտնձգություններից, Հատուկ քննչական ծառայությունը քրեական գործ հարուցեց ոստիկանի դեմ իբրև թե բռնություն կիրառելու փաստով: Այդ «գործով» ՀՔԾ հարցաքննության հրավիրելու մասին Արմեն Մարտիրոսյանին և Զարուհի Փոստանջյանին մարտի 12-ին պաշտոնական ծանուցագրեր է ուղարկել, որոնցում, սակայն, պահպանված չէ ՀՀ քրեական դատավարության օրենսգրքի 205 հոդվածի համապատասխան դրույթը, համաձայն որի` ծանուցագրում պարտադիր պետք է նշվի հարցաքննության կանչվողի կարգավիճակը: Հատկանշական է, որ մարտի 4-ին ՀՔԾ-ն իր հարուցած քրեական գործը իր կայք-էջում տեղադրում է մարտի 9-ին` «Ժառանգության» կողմից մարտի 3-ի դեպքերի վերաբերյալ Հաղորդում հանցագործության մասին ներկայացնելուց ժամեր անց:
Նույն օրը` մարտի 12-ին, գլխավոր դատախազությունը Տիգրան Փոստանջյանի դեմ սարքված մեղադրանքի վերաբերյալ իբրև թե նախաքննությամբ պարզված լրացուցիչ տեղեկություն հրապարակեց` նորից կոպտորեն խախտելով անմեղության կանխավարկածը: Այս երկրորդ հաղորդագրության նախաբանի որոշ հատվածների վերաբերյալ` «ՀՀ գլխավոր դատախազությունը, կարևորելով հանրության ստուգված և բազմակողմանի տեղեկատվություն ստանալու իրավունքը» և «…նկատի ունենալով… Տիգրան Փոստանջյանին առաջադրված մեղադրանքի շուրջ առաջացած հասարակական հնչեղությունը…,», պարզապես տեղեկացնենք դատախազությանը և «գործի» պատվիրատուներին, որ ընդդիմադիր ու քաղաքացիական ակտիվ գործչի ընտանիքի չեզոք անդամին պատանդ վերցնելու անբարոյական գործողության և «Ժառանգության» դեմ սանձազերծված արշավի վերաբերյալ համահասարակական հնչեղություններն ու նաև դրանցից բխող հետևանքները դեռ առջևում են: Իսկ ստուգված և բազմակողմանի տեղեկատվություն ստանալու հանրության իրավունքի իրացումը անհրաժեշտ է սկսել հոկտեմբերի 27-ի և մարտի 1-ի ոճրագործությունների, տարբեր տարիներին բարձրաստիճան բազմաթիվ պաշտոնյաների սպանությունների բացահայտումներից, Վերահսկիչ պալատի կողմից հրապարակված միլիոնավոր դոլարների չարաշահումների մեղավորների հայտնաբերումից, Հայաստանին տրամադրված հարյուր միլիոնավոր դոլարները գերազանցող վարկերը նպատակային ծախսելու վերաբերյալ համակողմանի ստուգումներ անցկացնելուց, վիքիլիքսյան աղմկալի բացահայտումների վերաբերյալ օբյեկտիվ քննություններ սկսելուց…
Հատկանշական է նաև, որ երբ Գյումրիում փետրվարի 17-ին «Ժառանգության» պատգամավորները գյումրեցիների հետ կես օր տևած ոստիկանական հանցավոր շրջափակումից ազատագրեցին գլխավոր փողոցը, և հաջորդ օրը` փետրվարի 18-ին, գլխավոր դատախազությունը գործ հարուցեց Տիգրան Փոստանջյանի դեմ, ապա համանման տրամաբանությամբ մարտի 11-ին ԱԱԾ-ի դիմաց անցկացված բողոքի ակցիայի հաջորդ օրը` մարտի 12-ին, հրապարակվեց Տիգրան Փոստանջյանի վերաբերյալ դատախազության երկրորդ հաղորդագրությունը, ինչպես նաև «Ժառանգության» պատգամավորներ Արմեն Մարտիրոսյանը և Զարուհի Փոստանջյանը ՀՔԾ հարցաքննության հրավիրվելու ծանուցագրեր ստացան:
Մեծագույն պատասխանատվության գիտակցումով մեր երկրի ու սերունդների առջև` վստահեցնում ենք ողջ հասարակությանը և նույնիսկ յոթ տարի կրկին իշխելու հանցագիրը ստորագրած իշխանությանը, որին «Ժառանգության» առաջնորդ Րաֆֆի Հովհաննիսյանը Հանրային հեռուստաընկերության եթերում որակեց որպես վերջնագիր հայ հասարակությանը, որ «Ժառանգությունը» քաղաքացիական այլևս անվախ հասարակության և իրապես ընդդիմադիր գործընկերների հետ միասին առավել վճռական է պայքարելու` հանուն Հայոց հայրենիքում ազատ ու արժանապատիվ ապրելու հայ մարդու բռնազավթված իրավունքի վերականգնման:
«Ժառանգութուն» կուսակցության լրատվական ծառայություն