Ինչպես հաղորդում է ռուսական RIA-Novosti գործակալությունը, հղում կատարելով Հյուսիսատլանտյան դաշինքում իր աղբյուրներին, ԱՄՆ-ը նախաձեռնել է ՆԱՏՕ-ի խորհրդի արտահերթ նիստ, որտեղ քննարկվելու է իրավիճակը Լիբիայում: Աղբյուրը նաև նշել է, որ նիստը կկայանա առաջիկա երեքշաբթի օրը` մարտի 15-ին:
Թեպետ ՆԱՏՕ-ն նախկինում հայտարարել էր, որ Լիբիայում ընդդեմ Քադաֆիի ուժերի ռազմական գործողություններ չի իրականացնելու, քանի դեռ չի ստացել միջազգային հանրության թույլտվությունն ու սանկցիան, սակայն Լիբիայում վերջին զարգացումները Արևմուտքին հավանաբար ստիպել են ավելի կտրուկ քայլերի դիմել:
Բանն այն է, որ Լիբիայի ընդդիմությունն օրեցօր թուլանում է` զիջելով կարևորագույն քաղաքները: Այս պահին ընդդիմությունը վերահսկում է երկրի երկրորդ քաղաքը` Բենղազին, և մի շարք այլ փոքր քաղաքներ:
Տեղեկացնենք նաև, որ ՆԱՏՕ-ի կազմում էլ միանշանակ դիրքորոշում չկա այս հարցի շուրջ: Մասնավորապես Թուրքիայի վարչապետ Ռեջեփ Թայիփ Էրդողանն այսօր զգուշացրել է ՆԱՏՕ-ի ռազմական միջամտության անօգուտ լինելու և վտանգավորության մասին, մինչդեռ Ֆրանսիան և Մեծ Բրիտանիան արդեն երկու շաբաթ է հայտարարում են Լիբիայի օդային տարածքը փակելու, ընդդիմությանն աջակցելու և ռմբակոծություններ իրականացնելու անհրաժեշտության մասին: