Այսօր Բաքվում ԵԱՀԿ գործող նախագահ Լիտվայի արտգործնախարար Ադրոնյուս Աժուբալիսը հանդիպել է Ադրբեջանի նախագահի, արտաքին գործերի նախարարի հետ։ Ադրբեջան կատարած այցով մեկնակում են ԵԱՀԿ գործող նախագահի հանդիպումները Հարավային Կովկասում:
Օդանավակայանում Ադրոնյուս Աժուբալիսը լրագրողներին ասել է, որ իր այցելության ընթացքում քննարկելու է մի շարք հարցեր, այդ թվում` տարածաշրջանում կայունությանը, անվտանգությանն ու համագործակցությանն առնչվող խնդիրները:
Վերջերս ադրբեջանական շփման գծում զոհված 9-ամյա ադրբեջանցու մասին խոսելով`Աժուբալիսն ասել է, թե այդ փաստը ևս մեկ անգամ ապացուցում է, որ դիպուկահարները պետք է հեռացվեն շփման գծից:
Ինչպես տեղեկացնում է «Ազատություն» ռադիոկայանը, այս միջադեպի կապակցությամբ կիրակի օրը համատեղ հայտարարություն են տարածել Լեռնային Ղարաբաղի պաշտպանության և արտաքին գործերի նախարարությունները:
Ղարաբաղը հերքում է Ադրբեջանի մեղադրանքները` կասկածի տակ առնելով Ֆարիզ Բադալովի մահվան հանգամանքները, չբացառելով նաև, որ երեխան զոհվել է ադրբեջանցիների դիրքերից արձակված կրակից։
«Ցավոք, Ադրբեջանի պաշտոնական քարոզչությունը չի խորշում և ոչ մի մեթոդից` շահարկելով անգամ երեխաների կյանքն ու մահը:
Հերթական օրինակ է դարձել ս.թ. մարտի 10-ին ադրբեջանական կողմի գնդակոծության հետևանքով Լեռնային Ղարաբաղի պաշտպանության բանակի ժամկետային զինծառայող Արթուր Աղաբաբյանի մահը: Ընդ որում` միջադեպը տեղի է ունեցել Լեռնային Ղարաբաղի և Ադրբեջանի զինված ուժերի շփման գծում ԵԱՀԿ դիտարկումից անմիջապես հետո:
Դա վստահության միջոցների ամրապնդմանն ուղղված` Հայաստանի, Ռուսաստանի և Ադրբեջանի նախագահների` մարտի 5-ին Սոչիում տեղի ունեցած հանդիպման արդյունքներով ձեռք բերված պայմանավորվածությունների կոպիտ խախտում է», – ասված է ղարաբաղյան կողմ հայտարարության մեջ։
Մարտի 15-16-ը ԵԱՀԿ գործող նախագահը կլինի Վրաստանում, իսկ մարտի 17-18-ը կայցելի Հայաստան։