Այսօր Իսրայելի արտաքին գործերի նախարար Ավիգդոր Լիբերմանը հայտարարել է, որ Համաս խմբավորումը պատրաստվում է գրավել Հորդանանի Արևմտյան ափը, սակայն սպասում է այն պահին, երբ կհռչակվի Պաղեստինի անկախությունը: Այս մասին Լիբերմանն ասել է Իսրայելի արտաքին անվտանգության հանձնաժողովի նիստի ժամանակ:
Հիշեցնենք, որ Պաղեստինի ինքնավարությունը բաժանված է երկու մասի` Հորդանանի Արևմտյան ափի և Գազայի հատվածի, որոնք մեկը մյուսի հետ ընդհանուր սահման չունեն: Համաս խմբավորումը 2007թ. գրավեց Գազայի հատվածը և այնտեղ ձևավորեց Արևմտյան ափից անկախ կառավարություն, սակայն չհայտարարեց Պաղեստինի բաժանման մասին:
«Համասը սպասում է այն օրվան, երբ Պաղեստինի ինքնավարության ղեկավար Մահմուդ Աբասը և վարչապետ Սալամ Ֆայադը միջազգային հանրությունից կստանան այն առավելագույնը, որ կարող են ստանալ պաղեստինցիները: Հենց այդ ժամանակ Համասը կգրավի իշխանությունը Արևմտյան ափում: Համասը սթափ է մտածում: Այդ է պատճառը, որ նրանք հիմա չեն ցանկանում իշխանությունը վերցնել»,- հայտարարել է Լիբերմանը:
Այսինքն, ըստ Լիբերմանի` եթե Համասը հիմա իշխանություն վերցնի, Պաղեստինն այս տարի, և հնարավոր է, շատ երկար ժամանակ անկախություն չստանա, քանի որ միջազգային հանրությունը չի վստահում Համասին: Այս դեպքում նրանք սպասում են, թե երբ միջազգային հանրության համար ընդունելի իշխանությունը` Մահմուդ Աբասի գլխավորությամբ, կստանա երկար տարիներ խոստացված անկախությունը:
Լիբերմանն անդրադարձել է նաև բանակցությունների խնդրին` նշելով, որ պաղեստինցիները բանակցություններ չեն ցանկանում, քանի որ միջազգային հանրության կողմից ակնկալում են ստանալ ավելին, քան բանակցությունների միջոցով: