Հայ Առաքելական եկեղեցու ներկայացուցիչ Տեր Շմավոն քահանա Ղևոնդյանը երեկ «ցնցող» բացահայտում է արել, թե «Հայաստանում նոր աղանդավորական կազմակերպություն է ստեղծվել` հանձինս «Կենդանի հավատ ընտանեկան եկեղեցու», որը Հայաստանում գործում է առանց գրանցվելու և ջանում է երգիչ- երգչուհիներին, ժամանակակից արվեստի ներկայացուցիչներին ներգրավել իր շարքերում: «Տեսեք, առանց գրանցվելու նրանք արդեն գործում են: Իրենք չեն վախենում և YouTube-ում ունեն նյութեր, որոնք լուսաբանում են իրենց գործունեությունը, և այդ ամենը այսօր անպատժելի է»,- հայտարարել է քահանան:
«Ես ուղղակի ապշած եմ Հայ Առաքելական եկեղեցու սպասավորի անտեղյակության վրա, քանի որ նա առնվազն տասը տարի ուշացել է: Մեր եկեղեցին Հայաստանում գործում է մոտ տասը տարի և այդ մասին տեղյակ է կառավարությանն առընթեր կրոնի պետական խորհուրդը»,- «Առաջին լրատվական»-ի հետ զրույցում ասաց «Կենդանի հավատ» եկեղեցու առաջնորդ Արամ Ասատրյանը` հավելելով. «Իսկ ինչ վերաբերում է գրանցված չլինելու հանգամանքին, ապա եկեղեցին կարող է գրանցվել, եթե ունի 200 անդամ, և դա այսօրվա օրենքի պահանջն է, իսկ մենք այսօր 150 անդամ ունենք»:
