Կրթության և գիտության նախարարության թեժ գծին զանգերի քանակը կտրուկ նվազել է: «Առաջին լրատվական»-ի հետ զրույցում տեղեկացնում է ԿԳՆ հանրակրթության վարչության պետ Նարինե Հովհաննիսյանը՝ հավելելով, որ նախորդ տարիներին՝ այս ժամանակահատվածում, հատկապես Վերջին զանգի ծախսերի հետ կապված բողոքները շատ էին, այս տարի պատկերն այլ է՝ «մեկ-երկու զանգ ունենք դրամահավաքության վերաբերյալ: Զանգը Գյումրուց է եղել, բոլոր տիպի մանրամասները հիմա ճշտվում են»:
Նարինե Հովհաննիսյանը նաև ընդգծում է, որ Վերջին զանգի խնջույքների համար իրականացվող դրամահավաքության հետ դպրոցը առնչություն չունի, բոլոր տիպի դրամահավաքությունները դպրոցներում արգելվում են: Վարչության պետը նաև խոստովանում է, որ իրենց չի հաջողվել երբևիցե ավարտական խնջույքները արգելել, փորձել են բայց անարդյունք, նույնիսկ ուսուցիչները խնջույքներին չեն մասնակցել:
Ինչպես արդեն տեղեկացրել էինք, մեր խմբագրությունը բազմաթիվ զանգեր է ստանում. շրջանավարտների ծնողները ոչ միայն ավարտական խնջույքի համար իրականացվող դրմահավաքի մասին են տեղեկացնում, այլև բողոքում են, որ ծախսերը խնջույքով չեն սահմանափակվում, գումար են հավաքում սցենարի համար, տեսանկարահանման համար: Նարինե Հովհաննիսյանը այս կապակցությամբ զարմանում է. «Հետամնաց մեթոդ է, քաղքենիություն. իրենց հոգու, սրտի խոսքը ուսուցիչներին պիտի աշակերտները ասեն»:
Փորձեցինք նաև պարզել՝ այս ժամանակաhատվածում շրջայցեր դպրոցներում կատարվո՞ւմ են: «Հանրակրթության վարչությունը ականատես է լինում դպրոցի տարբեր տիպի միջոցառումներին: Ինչ վերաբերում է ուսումնասիրություններին, ապա դրանք արվում են կրթության տեսչության կողմից»,- ասաց ԿԳՆ հանրակրթության վարչության պետը:
Առավել մանրամասն՝ առաջարկվող տեսանյութում:
