Օրերս ԲՀԿ առաջնորդ Գագիկ Ծառուկյանը հայտարարությամբ հանդես եկավ՝ մասնավորապես նշելով, որ թե՛ խորհրդարանական, թե՛ նախագահական ընտրությունների դեպքում հաղթանակն այս անգամ շրջանցելու է Մելիք-Ադամյան փողոցը: Այսպիսով, Գագիկ Ծառուկյանը կարծես պատասխանում էր Էդուարդ Շարմազանովին, որը օրերս վստահություն էր հայտնել, թե նախագահի կամ վարչապետի պաշտոնին հավակնողների ուղին անցնելու է Մելիք-Ադամյան փողոցով, որտեղ գտնվում է Հանրապետականի գրասենյակը: Արդյոք Գագիկ Ծառուկյանի հայտարարությունն ուղղված էր Շարմազանովի՞ն, իր կուսակցությա՞նը, թե՞ Քառյակին:
«Այս հայտարարության իմաստը Էդուարդ Շարմազանովի ելույթին հակադարձելն էր կամ իրար հետ ձեռնամարտով ստուգել, թե ով է ավելի ուժեղ։ Բայց կարծում եմ՝ թե՛ Շարմազանովի, թե՛ Գագիկ Ծառուկյանի հայտարարությունների մեջ քիչ ճշմարտություն կա, որովհետև եթե խոսքը վերաբերում է ընտրություններին, ապա մինչև ընտրությունները դեռ շատ ջուր կզուլալվի, այնպես որ, հիմա հայտարարելը, թե ով է հաղթելու, ինձ թվում է՝ մի փոքր պարծենկոտություն է»,- «Առաջին լրատվական»-ի հետ զրույցում ասաց Քաղաքական և միջազգային հետազոտությունների հայկական կենտրոնի տնօրեն Աղասի Ենոքյանը՝ հավելելով, որ, իհարկե, հայտարարությունն ուղղված էր թե՛ իր կուսակիցներին, թե՛ ժողովրդին, թե՛ հատկապես Քառյակին, որ հանկարծ Քառյակը չտրոհվի և միշտ մնա Գագիկ Ծառուկյանի առաջնորդությամբ:
Զրուցակցիս խոսքով՝ սա քաղաքական PR-ի կարևոր մասն է, որն անհրաժեշտ է անել:
«Էսօր երկրորդը չկա, որտեղ կարող ես գնալ, հարցնել, սկսած բոլոր կառույցներից, բոլոր ոլորտներից՝ միանշանակ, մարդիկ հավատում են մեր կուսակցությանը, մեզ»,- հայտարարել էր Գագիկ Ծառուկյանը: Աղասի Ենոքյանից հետաքրքրվեցինք՝ արդյոք կա՞ 0,01 տոկոս վստահություն ԲՀԿ-ի նկատմամբ։
«Շատ դժվար է ասել, որովհետև իրենք պնդում են, որ հետազոտություններ են անում, բայց կա մյուս խնդիրը՝ այլևս որևէ ուժ չկա, որին հավատան, այնպես որ, այս քաղաքական վակուումում Գագիկ Ծառուկյանին հավատալը ավելի հեշտ է թվում»,- նշեց նա:
Մինչև խնամուն՝ Հովիկ Աբրահամյանին վարչապետ նշանակելը մի՞թե հաշվարկված չէին բոլոր քայլերը. Աղասի Ենոքյանի կարծիքով՝ հաշվարկված էին բոլոր քայլերը, որ իսկապես պետք է նշանակեին խնամուն, և այնտեղ խոսք չկար կառավարության քաղաքականություն փոխելու մասին, զուտ անձերի խնդիր էր»,- ասաց Աղասի Ենոքյանը:
Կարծիքը, թե մեզանում խաղաղ իշխանափոխություն, անցում է տեղի ունենում, Աղասի Ենոքյանը կիսում է. «Տպավորություն կա, որ խաղաղ իշխանափոխություն է տեղի ունենում, բայց որքանով խաղաղ կլինի մինչև վերջ՝ չեմ կարող ասել»,-հավելեց զրուցակիցս: