Օրը ցերեկով անտարբերության պայմաններում կեղծվում են մեր պատմության շատ փաստեր. պատմամշակութային կոթողների կողքերին տեղադրված վահանակների միջոցով կեղծ տեղեկատվություն է տրվում հաճախ, որն անգամ մեր ազգային անվտանգությանն է սպառնում: Այս մասին «Երկիր Մեդիա» հեռուստաընկերության «Երկրի հարցը» հաղորդման եթերում ասել է ԵՊՀ պատմության ֆակուլտետի դեկան Էդիկ Մինասյանը:
«2008 թվականից հանրապետության տարածքներում վահանակներ են տեղադրվել` Հաղպատում, Սանահինում՝ Սայաթ-Նովային նվիրված, որտեղ նշվում է, թե 18-րդ դարի նշանավոր բանաստեղծը ծառայում էր Հերակլ Երկրորդի արքունիքում և, լինելով պալատական, օգնում էր երեք մրցակից թագավորությունների` Ադրբեջանի (Աղվանք), Հայաստանի և Վրաստանի միջև հարաբերությունների հարցում: Այնինչ մենք գիտենք, որ Ադրբեջանցիները պետականություն ստեղծեցին 1918 թվականին, իսկ մինչ այդ հիշատակվել են որպես կովկասյան թաթարներ: Ադրբեջանցիները, կեղծելով քարոզչությունն ու պատմությունը, իրնեց համարում են աղվանցիների ժառանգներ` քրիստոնյա Աղվանքն էլ համարելով իրենց պետությունը»,- ասել է պատմաբանը:
Նա պատմել է, որ, իմանալով այս մասին, դիմել են մշակույթի նախարարին, ով զայրացել է, կանչել տեղակալին և պահանջել անմիջապես շտկել: Անցել է երկու տարի, սակայն ոչինչ չի արվել: Պատմաբանը նշել է, որ ցուցանակները տեղադրել է ամերիկյան կազմակերպություն` առանց քննարկումների, պատմաբանի խորհրդակցության և առանց հաշվետու լինելու նախարարությանը: Նման դեպքերը քիչ չեն. օրինակ` Քարահունջի մոտ տեղադրված ցուցանակի վրա նախ նշված է Քարահունջի թուրքական անունը: Ընդ որում, պատմաբանի խոսքերով, կան նաև տառասխալներ տեքստերի մեջ: Էդիկ Մինասյանը դժգոհել է անփութությունից: «Ես հավատում եմ նախարարի անկեղծությանը, որովհետև նա տրամադրված էր վճռականորեն: Պարզապես երևի նախարարության օղակների անփույթ աշխատանքի արդյունք է»,– ասել է նա:
Պատմության ֆակուլտետի դեկանը, ի դեպ, ենթադրում է, որ կատարվածի մեջ նաև հակառակորդի մասնակցությունը կա, քանի որ, պատմական հուշարձանների մոտ հայոց պատմության մասին տեղեկությունները փակցնում է ոչ թե հայկական, այլ ամերիկյան կազմակերպություն:
Հայաստանի անկախութանը նվիրված ժամանակավոր ցուցահանդես կազմակերպելու նպատակով կառավարությունը որոշել է 63 անշարժ հուշարձան մարզերից տեղափոխել Երևան: Էդիկ Մինասյանն այս որոշումը համարել է անընդունելի` նշելով, որ բազմաթիվ հուշարձաններ երկար ժամանակ մնալով` դարձել են սրբատեղի: Բացի այդ, նա նշել է, որ պետք է բեռնաթափել Երևանը, ոչ թե մարզերը: Պատմաբանի խոսքերով՝ սա նաև հակասում է մարզերի համաչափ զարգացման վերաբերյալ կառավարության հռչակած սկզբունքներին:
