Շաբաթ օրը Ծաղկաձորում Սերժ Սարգսյանը հայտարարեց, թե առաջիկայում փոփոխություններ են լինելու ոստիկանությունում, դատաիրավական համակարգում և հարկային ու մաքսային կառույցներում: Սա ինչ-որ առումով զարմանալի հայտարարություն է, քանի որ խոսքը իշխանական ռեպրեսիվ ապարատի մասին է, և եթե նախագահի մակարդակով արվում է նման հայտարարություն, ապա դա կարող է կազմալուծել այդ համակարգի աշխատանքը:
Այսինքն՝ մարդիկ կարող են մոտալուտ փոփոխություններն ընկալել որպես աշխատանքին հրաժեշտ տալու որոշակի նախանշան, և կսկսեն աշխատել անփութորեն, առանց իշխանությանը նախկին հավատարմությամբ ծառայելու: Իսկ որ այդ մարմիններում աշխատանքը հենց իշխանական հավատարմության վրա է հիմնված՝ կասկած չկա, քանի որ այլ բան դժվար է ենթադրել՝ ոստիկանության, դատաիրավական համակարգի և հարկայինի ու մաքսայինի իրական գործունեությունից դատելով: Այդ կառույցները պատրաստ են հանուն իշխանության ոտնահարել քաղաքացիների, գործարարների բոլոր իրավունքները:
Իշխանությունն էլ Հայաստանում պահվում է մասնավորաբար այդ ամենաթողության վրա: Հենց այդ առումով է տարօրինակ, որ Սերժ Սարգսյանը խոսում է այդ կառույցներում փոփոխությունների մասին: Սակայն ամեն ինչ տեղն ընկավ արդեն հաջորդ իսկ օրը, երբ ոստիկանները մեծ գրոհով առևանգեցին ու ձերբակալեցին Հայ ազգային կոնգրեսի համակիր Սամսոն Խաչատրյանին:
Այդ իրողությունը պարզ դարձրեց ամեն բան, և այժմ թերևս հասկանալի է, թե ինչ էր ասում Սերժ Սարգսյանը: Նրա հայտարարությունը գուցե հասարակության մեջ էր տարակուսանք առաջացրել՝ մի՞թե իշխանությունը որոշել է ձեռք բարձրացնել իր իսկ ռեպրեսիվ հիմքի վրա: Բայց այդ ռեպրեսիվ կառույցները, կարծես թե, միանգամայն ճիշտ են հասկացել իշխանության, այսինքն՝ Սերժ Սարգսյանի մեսիջը:
Փոփոխություններ այդ կառույցներում իսկապես կլինեն, և դրանք կառնչվեն այն անձանց, ում հավատարմությունը, նվիրվածությունն ու էնտուզիազմը իշխանությունների կասկածը կառաջացնի: Ըստ ամենայնի, վերջին շրջանում հասարակական լուրջ տրամադրությունները, իրավունքի, օրենքի և արդարության համար պայքարելու հասարակության հաստատակամությունն ու, ոստիկանական ռեպրեսիաներին հակառակ, թե՛ հանրահավաքի գնալը, թե՛ բողոքի ցույցեր անելը իշխանության մեջ մտավախություն են առաջացրել, որ ուժային համակարգում կարող են երկմտել, վարանել, երերալ, ի վերջո՝ հասկանալ, որ ժողովրդի իրավունքներին դեմ գնալն ու օրինական իրավունքները ճնշելը հանցագործություն է:
Ու թերևս որոշվել է սպառնալ` ով կերերա, ով կվարանի, կդառնա ուժային կառույցներում փոփոխությունների ենթակա: Համենայն դեպս, այն, որ փոփոխությունների մասին Սերժ Սարգսյանի ելույթից անմիջապես հետո տեղի է ունենում ոստիկանության ավանդական մեթոդների կիրառումը ՀԱԿ համակիր Սամսոն Խաչատրյանի հանդեպ, Սերժ Սարգսյանի ելույթի մասին այլ եզրակացության հնարավորություն կարծես թե չի թողնում: