«Եթե մարդիկ ունեն բողոք` դա կապված չէ կոմունիկացիայի միջոցների, մասնավորապես՝ սոցիալական ցանցերի հետ: Եթե մարդիկ պատրաստ են հեղաշրջման,ապա առանց սոցիալական ցանցերի էլ դա կանեին: Դրանք միայն արագացնում են գործընթացը»,- այս մասին այսօր հրավիրված ասուլիսի ընթացքում ասաց ԵՊՀ կիրառական սոցիոլոգիայի ամբիոնի վարիչ Արթուր Աթանեսյանը:
Այսուհանդերձ, սոցիոլոգը կարծում է, որ իշխանությունները պետք է ուշադրություն դարձնեն ցանցերի քննարկումներին, քանի որ դրանք արտահայտում են հասարակական կարծիքը:
«Սոցիալական ցանցերը փակելու կամ արգելելու մասին խոսք լինել չի կարող, քանի որ դա կունենա լրիվ հակառակ էֆեկտը: Մարդիկ կսկսեն բողոքի ակցիաներ կազմակերպել, որոնք ավելի բուռն կլինեն»,- ասում է Աթանեսյանը:
Ըստ վերջին տվյալների` այլ երկրների շարքում Հայաստանը 124-րդ տեղում է facebook օգտագործմամբ և զիջում է Վրաստանին ու Ադրբեջանին, որոնք համապատասխանաբար 86-րդ և 96-րդ տեղում են:
Իրական է այն, որ վերջին կես տարվա ընթացքում Հայաստանում facebook օգտագործողների թիվը ավելացել է 5000-ով:
