Կառավարության մամուլի կենտրոնում տեղի ունեցած այսօրվա ճեպազրույցի թեման «Էլեկտրոնային կառավարում. նորամուծություններ էլեկտրոնային կառավարաման համակարգում», որի շուրջ պարզաբանումներ է տվել ՀՀ կառավարության աշխատակազմի ղեկավար Դավիթ Սարգսյանը:
Բանախոսը նշել է, որ էլեկտրոնային կառավարումը ոչ միայն ՀՀ Կառավարության, այլ նաև ՀՀ նախագահի նախընտրական ծրագրի կարևորագույն դրույթներից է և նպատակ ունի հասարակության համար թափանցիկ դարձնել կառավարության գործունեությունն ու պարզեցված ծառայություններ մատուցել գործարար շրջանակներին: Դավիթ Սարգսյանի խոսքով, արդեն կան առաջին դիմումատուները, մասնավորապես՝ քաղաքաշինության ոլորտում:
Լիցենզավորման վճարը առայժմ իրականացվելու է բանկային վճարումների միջոցով, իսկ մեկ ամսվա ընթացքում արդեն պատրաստ կլինի քարտային փոխանցումների տարբերակը:
www.e-gov.am կայքի միջոցով արդեն իրականացվում են մի շարք էլեկտրոնային ծառայություններ, որոնք են՝ լիցենզիաների ընդունումը, հարկային հաշվետվությունների էլեկտրոնային կերպով ներկայացումը:
Կայքում գործում է համակարգ, որտեղ հնարավորություն է ստեղծված էլեկտրոնային կերպով պատենտների, ապրանքային նշանների գրանցումը ՀՀ մտավոր սեփականության գործակալությունում:
ՀՀ աշխատակազմի ղեկավարը նշել է. «Առաջիկա շաբաթների ընթացքում ձեզ ենք ներկայացնելու էլեկտրոնային պետական ռեգիստրի համակարգը, որի միջոցով բիզնեսը հնարավորություն կստանա գրանցել կազմակերպություններ էլեկտրոնային կերպով 15-20 րոպեների ընթացքում»:
Դավիթ Սարգսյանը անդրադարձել է նաև www.e-gov.am կայքի ստեղծումից ի վեր արձանագրված մյուս ձեռքբերումներին:
