Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր սկսվեց մետրոպոլիտենի աշխատակիցների բողոքի քննությունը:
Հիշեցնենք, որ ամիսներ առաջ «Կուտակային կենսաթոշակների մասին» ՀՀ օրենքի պարտադիր բաղադրիչի դեմ դուրս եկած՝ Երևանի Մետրոպոլիտենի աշխատակիցներ Անդրանիկ Գևորգյանը, Սևակ Հովհաննիսյանը և Գագիկ Գալստյանը Մետրոպոլիտենի առջև բողոքի ակցիայից 2 օր հետո ազատվեցին աշխատանքից՝ ղեկավարության կողմից վստահությունը կորցնելու՝ ՀՀ Աշխատանքային օրենսգրքի 113-րդ հոդվածի 6-րդ մասի հիմնավորմամբ: Սակայն բոլորի համար էլ ակնհայտ էր, որ աշխատակիցներն աշխատանքից ազատվել են կուտակային պահումներին դեմ դուս գալու համար: Հիմա աշխատակիցները դատարանից պահանջում են անվավեր ճանաչել իրենց՝ աշխատանքից ազատման հրամանները, վերականգնել աշխատանքը և փոխհատուցել հարկադիր պարապուրդի համար:
Նշենք, որ մետրոպոլիտենի տնօրինությունը նախապես չէր տեղեկացրել աշխատակիցներին աշխատանքից ազատման մասին, որևէ գրավոր զգուշացում ևս չէր ուղարկվել նրանց: Այս փաստն այսօր արձանագրվեց նաև դատարանում: Մետրոպոլիտենի իրավաբանական բաժնի աշխատակից Արտակ Երեմյանն այդպես էլ չկարողացավ հիմնավորել, թե աշխատակիցները հատկապես ինչ խախտումներ են թույլ տվել, որ արժանացել են տնօրինության անվստահությանը և անմիջապես ազատվել են աշխատանքից: Նա միայն նշեց, որ ընկերության նախկին աշխատակիցներն իրենց պարտականությունները պատշաճ չեն կատարել, անընդհատ ինչ-որ ստուգումներից և գրանցամատյանում գրառումներ չկատարելու մասին էր խոսում, բայց իր ասածի որևէ հիմնավորում չէր բերում: Ամեն դեպքում, դատարանը պատասխանող կողմի վրա թողեց աշխատակիցների թերացումը ապացուցելու պարտավորությունը:
Հայցվոր Անդրանիկ Գևորգյանի համար ծիծաղելի էին պատասխանող կողմի հակափաստարկները: Սակայն նա չշտապեց հայտարարել, որ իրենց աշխատանքից ազատելու պատճառը կուտակային պահումների դեմ բողոքելն է եղել: «Եթե ինձ ազատելու հրամանի մեջ այդպիսի բան չկա, ես հիմա չեմ կարող նման բան պնդել»,- ասաց Անդրանիկը:
Վերջինիս փաստաբանը, սակայն, նշեց, որ իր վստահորդներին աշխատանքից ազատելու պատճառը իսկապես պարտադիրի դեմ իրականացված ակցիաներն են եղել: «Աշխատակիցների հեռացումը անձնավորված է և քաղաքականացված»,- ասաց փաստաբան Քրիստինա Գևորգյանը: