Իսրայելի հատուկ կառավարական հանձնաժողովը, որը գլխավորում է երկրի վարչապետ Բենյամին Նաթանյահուն, հավանություն է տվել Հորդանանի Արևմտյան ափում (պաղեստինյան տարածքներում) իսրայելցիների համար 500 տուն սարքելու նախագծին: Իսրայելի իշխանությունները չեն թաքցրել, որ այս քայլը պատասխանն է Արևմտյան ափում տեղի ունեցած սպանության: Տեղեկացնենք, որ երեկ Հորդանանի Արևմտյան ափում սպանվել էր հրեաների 5-հոգանոց ընտանիք, որից երեքը անչափահաս երեխաներ էին:
Սպանվածների բարեկամներին այցելելիս Իսրայելի վարչապետ Նաթանյահուն ասել է. «Նրանք կրակում են, մենք` կառուցում»: Այս մասին հաղորդել է Associated Press գործակալությունը:
Հիշեցնենք, որ իսրայելական բնակավայրերի կառուցումը պաղեստինյան տարածքներում ամենամեծ խնդիրն է իսրայելապաղեստինյան բանակցություններում: Ակնհայտ է, որ իսրայելական կառավարության այս որոշումը թույլ չի տա արդեն մի քանի ամիս շարունակ փակուղում գտնվող բանակցությունները վերսկսել, ինչի մասին անընդհատ հայտարարում էր միջնորդի դեր իրականացնող Միացյալ Նահանգների վարչակազմը:
