«Առաջին լրատվական»-ի զրուցակիցն է արդարադատության նախարարի տեղակալ Արամ Օրբելյանը:
-Պարոն Օրբելյան, տեղեկություն կա, որ հրաժարականի դիմում եք ներկայացրել: Ճի՞շտ են տեղեկությունները:
-Այո, դիմում ներկայացրել եմ չորեքշաբթի օրը: Նոր նախարարը պետք է ազատություն ունենա իր տեղակալներին ընտրելու հարցում: Երբ որ առաջարկներ լինեն, կքննարկենք: Այս պահին դեռևս վարչապետի որոշում չկա, որ լինի՝ կիմանանք:
-Հրաժարականի դիմում ներկայացնելը ձե՞ր որոշումն էր, թե՞ ձեզ պարտադրվել է դիմում գրել:
-Այո, այո, բացառապես իմ որոշումն է եղել: Ես բավական երկար ժամանակ պլանավորում էի փաստաբանությամբ զվաղվել: Սա հարմար առիթ է: Ի հավելումն, կարծում եմ, որ ցանկացած պաշտոնյա պետք է հնարավորություն ունենա իր աշխատակազմին, տեղակալներին ու խորհրդականներին ընտրելու:
-Գուցե Հովհաննես Մանուկյանը ցանկանար աշխատե՞լ ձեզ հետ, ինչո՞ւ եք շտապում:
-Կորոշի, կցանկանա, կքննարկենք: Դիմումը որոշակի ընթացք պետք է ունենա: Նորից կարող են նշանակել միշտ էլ:
-Այսինքն՝ եթե նոր նախարարը ցանկություն հայտնի ձեզ հետ աշխատելու, պատրա՞ստ եք դիմումը հետ վերցնել:
-Կքննարկենք, քննարկումներից հետո պարզ կլինի:
-Խոսակցություններ կան, որ դուք ձեր տեղը զիջում եք ԱԺ ՀՀԿ-ական պատգամավոր Արփինե Հովհաննիսյանին: Հենց դրա համար էլ ձեզ ասվել է, որ դիմում գրեք:
-Դժվարանում եմ մեկնաբանել: Իրականում ես դիմումս գրել եմ ոչ թե այսօր, այլ չորեքշաբթի օրը: Իրականում որևէ մեկի կողմից ինձ պարտադրված չի եղել դիմում ներկայացնել: Թե դիմումին ինչ ընթացք կտրվի, ով կգա, կամ ես կմնա՞մ, թե՞ ոչ՝ դեռևս դժվարանում եմ որևէ բան ասել:
-Ձեր որոշումը քննարկե՞լ եք Հրայր Թովմասյանի հետ:
-Դիմումը պարոն Թովմասյանն է մակագրել, երբ դեռևս նախարար էր:
-Փաստորեն, եթե ընդունվի ձեր հրաժարականը, փաստաբանությամբ եք զբաղվելու:
-Այո, փաստաբանությամբ եմ զբաղվելու: (Օրբելյանը «Կոնցեռն դիալոգ» փաստաբանական ընկերության բաժնետեր է.- խմբ.):
–Հնարավո՞ր է՝ ձեր օրինակին հետևեն նաև ձեր մյուս գործընկեր փոխնախարարները:
-Այս պահին դժվարանում եմ ասել: Իրենց զանգեք, իրենք ավելի կոնկրետ կասեն:
–Իսկ ինչպե՞ս եք գնահատում նոր նախարարի ընտրությունը:
-Թույլ տվեք չպատասխանել այդ հարցին: