Այս օրերի ամենադաժան սպանությունը, որը ցնցեց հանրությանը, համացանցը, Ռուսաստանի Տյումեն քաղաքում երիտասարդ հայուհու, երեք երեխաների մայր Նունե Սարգսյանի դանակահարումն էր: Ապրիլի 21-ին իր բնակարանում սպանվել էր Նունե Սարգսյանը՝ նրան սկզբում թալանել էին, այնուհետև հասցրել դանակի՝ շուրջ 40 հարված: Ըստ Նունեի հարազատների՝ նա այդ օրը պետք է նշեր իր ծննդյան տարեդարձը: 22-ամյա՝ «Պիցցա Էքսպրես» ընկերությունում աշխատող առաքիչ Զախար Կովրիգինին իրավապահ մարմինները բերման էին ենթարկել հենց նույն օրը, որը տվել էր խոստովանական ցուցմունք, ասելով, որ այդ օրը պիցցա առաքելու ցուցում է ստացել, առաքել է պիցցան, ստացել գումարը, հեռացել, ապա մի փոքր անց կրկին վերադարձել` պատվերի գումարը վերստուգելու պատրվակով: Տանտիրուհին համաձայնել է ներս թողնել նրան: Այնուհետեւ Կովրիգինը դանակ է հանել և բռնություն գործադրելու սպառնալիքով պահանջել, որ աղջիկը իրեն հանձնի ձեռքի տակ եղած ողջ գումարն ու արժեքավոր իրերը: Ստանալով պահանջվածը` ոսկե մատանիներ եւ գումար, չարագործը, մտավախությամբ, որ տուժողը տեղի ունեցածի մասին կհայտնի իրավապահ մարմիններին, նրան դանակի առնվազն 40 հարված է հասցրել՝ երիտասարդ կնոջը հասցնելով մահվան: 26-ամյա Նունեի սպանությունը ցասման մեծ ալիք է բարձրացրել ոչ միայն Տյումեն քաղաքում, որտեղ ապրել է Նունեն, այլև Երևանում, որտեղ սպանությունը շատերը մեկնաբանում են որպես հայատյացության, քսենոֆոբիայի բարձր դրսևորում: «Առաջին լրատվական»-ի հետ զրույցում Նունեի ամուսինը՝ Արամ Ապրեսյանն, ասաց, որ չէր ցանկանա մինչ դատական գործընթացի սկիզբը խոսել կատարվածի, դրա պատճառների մասին, քանի որ ձերբակալվածն ընդամենը կասկածյալ է, և ցանկացած պատճառի մասին խոսքն այսօր ավելորդ է:
«Ես ցանկություն չունեմ ինչ-որ մեկնաբանություն անել, քանի դեռ դատերը չեն սկսվել»,- ասաց նա: Վերջինս իր շնորհակալությունը հայտնեց, որ Հայաստանում կիսում են իր ընտանիքի ողբերգությունը, դատապարտում, ցավում, բայց ոչնչով օգնել չեն կարող, քանի որ պետք է սպասել տեղական դատարանին: Հարցին, թե վստահություն կա՞ տեղական դատարանի հանդեպ, ասաց հավատում է, որ արդարություն կլինի, քանի որ բոլոր ապացույցները կան, իսկ մինչ այդ չէր ցանկանա դատարկ խոսել: