Թուրքական Hürriyet թերթը, վկայակոչելով ԱՄՆ արդարադատության նախարարությանը, նշում է, որ 2010 թվականին Թուրքիան ԱՄՆ-ում ծավալած լոբբիստական աշխատանքների վրա ծախսել է 3.3 միլիոն դոլար: Այդ գումարի մեծ մասը հատկացվել է ԱՄՆ Կոնգրեսում Հայոց ցեղասպանությունը ճանաչող թիվ 252 բանաձևի տապալմանը:
Այդ պլանում Թուրքիայի օգտին գործունեություն են ծավալել 7 ընկերություններ, որոնցից 1-ը ներկայացրել է Նյու Յորքը, իսկ 6-ը` Վաշինգտոնը: Ստորև ներկայացված են այդ ընկերություններն ու Թուրքիայից ստացված գումարի չափը.
Gephardt Group: 1.424.113
Dickstein Shapiro: 535.500
Caspian: 168.000
Mercer: 50.000
Fleishman-Hillard: 590.859
30 Point Strategies: 270.000
Silver Associates: 270.000
Հիշեցնենք, որ ԱՄՆ արդարադատության նախարարության տվյալներով, 2008 թվականին Թուրքիան, մյուս երկրների համեմատ, ամենաշատն է ԱՄՆ Կոնգրեսում լոբբինգի ենթարկել իր շահերը (2268 անգամ): Միևնույն ժամանակ, այդ գործունեության վրա ծախսած գումարի չափով օտար երկրների շարքում Թուրքիան զբաղեցրել է 4-րդ տեղը (4.2 միլիոն դոլար)` այդ ցուցանիշով զիջելով միայն ԱՄԷ-ին (11 միլիոն դոլար), Մեծ Բրիտանիային (6 միլիոն դոլար) և Ճապոնիային (4.23 միլիոն դոլար):
ԱՄՆ-ում թուրքական լոբբինգի գործունեության ակտիվության գագաթնակետը գրանցվել է 2007 թվականի վերջին, երբ Կոնգրեսը քննարկում էր Օսմանյան կայսրությունում Հայոց ցեղասպանության ճանաչման փաստը: Այդ ժամանակ թուրքական լոբբիի ներկայացուցիչները մեկ ամսվա ընթացքում 673 հանդիպում են ունեցել ամերիկյան կոնգրեսականների ու հրեական լոբբիի ներկայացուցիչների հետ: