Երեկ տեղեկացրել էինք, որ մարտի 12-ին` ժամը 13.15-ի սահմաններում, Արաբկիր շտապ օգնության ենթակայանից ահազանգ էր ստացվել ոստիկանության Քանաքեռ-Զեյթունի բաժին, որ Մ. Ավետիսյան 1-ին փողոցի տներից մեկում երիտասարդ աղջկա դիակ կա: Այդ մասին հայտնել էր ֆոտոլրագրող Գագիկ Շամշյանը: Դիակի վրա բռնության հետքեր չէին հայտնաբերվել:
Աղջիկը, ըստ որոշ տեղեկությունների, ինքնասպանություն էր գործել մեծ քանակի դեղահաբեր ընդունելու միջոցով: Հարևանները ֆոտոլրագրողին հայտնել էին, որ տեղի է ունեցել ինքնասպանություն: Ինքնասպան էր եղել Երևանի պետական համալսարանի իրավաբանական ֆակուլտետի ուսանողուհի, 20-ամյա Լիա Հակոբյանը: Մեր տեղեկություններով աղջիկն ինքնասպանությունից առաջ գրություն էր թողել, որտեղ կային այսպիսի տողեր. «Պապա ջան, քեզանից շնորհակալություն, դու լավ մարդ ես, ես հոգնել եմ էս կյանքից ու ձեզ համար պատուհաս եմ դառել»:
Հարևանները ֆոտոլրագրողին հայտնել էին, որ աղջիկը նույն օրվա առավոտյան Կիևյան կամրջից իրեն ցած նետած և մահացած, 22-ամյա Միքայել Վասիլյանի ընկերուհին էր:
Սակայն, ոստիկանության օպերատիվ քննչական խումբը արդեն պարզել է, որ հարևանների տեղեկությունները չեն համապատասխանում իրականությանը:
Իսկ մենք պարզել ենք, որ Կիևյան կամուրջից իրեն նետած 22-ամյա Մ. Վասիլյանը ամուսնացած էր և ուներ մանկահասակ երեխա: