«Նոր ժամանակներ» կուսակցության նախագահ Արամ Կարապետյանի դիտարկմամբ` Հայաստանի Հանրապետական կուսակցությունն այսօր զբաղվում է մի բանով, որը կոչվում է ագիտացիա եւ պրոպագանդա: Արամ Կարապետյանը իշխանական կոալիցիայի կուսակցությունների միջեւ չի տեսնում տարբերություն: ՆԺԿ նախագահը կանխատեսեց, որ առաջիկա ԱԺ ընտրությունների ժամանակ ՀՀԿ-ն, Սերժ Սարգսյանի գլխավորությամբ, կենտրոնացնելով բոլոր ռեսուրսները, ամեն ինչ անելու է, որպեսզի ամեն ինչ վերցնի իր ձեռքը եւ նախապատրաստվի 2012-2013 թ.թ պրոցեսներին: «Բարգավաճ Հայաստանը», Արամ Կարապետյանի դիտարկմամբ, եւս ամեն ինչ անելու է, որ ինքը կոալիցիայում մեծ դեր ունենա: Իսկ արմատական ընդդիմությունը պետք է ընտրություններն օգտագործի ժողովրդի ընդվզումն ապահովելու համար: ՆԺԿ նախագահի համար գաղտնիք չէ, որ Սերժ Սարգսյանը երկրորդ անգամ է ուզում հայտնվել ՀՀ Նախագահի աթոռին: Այդ իսկ պատճառով էլ նա կանխատեսեց, որ ինչպես իրեն, այնպես էլ Րաֆֆի Հովհաննիսյանին չեն գրանցելու որպես ՀՀ Նախագահի թեկնածու: Փոխարենը քաղաքական դաշտում, որպես ընդդիմադիր գործիչ, հայտնվելու է մի նոր մարդ, որին հաղթելու է Սերժ Սարգսյանը: Այդ մարդու անունը, սակայն, Արամ Կարապետյանը հրաժարվեց տալ: Նա միայն նշեց, որ այդ մարդը լինելու է ընդդիմությունից: Միաժամանակ, նա վստահեցրեց, որ այդ ծրագիրը չի աշխատելու: