Հանգստյան օրերին կայացավ Իսպանիայի առաջնության 28-րդ տուրը: Ինչպես միշտ, մեծ հետաքրքրություն էին առաջացնում առաջատարների մասնակցությամբ հանդիպումները: Չնայած Ժոզե Մոուրինյոյի՝ առաջնության խաղացանկի հետ կապված բողոքներին, «Ռեալ»-ն առանց մեծ դժվարության հյուրընկալվելիս հաղթահարեց «Հերկուլես»-ի արգելքը: «Արքայական» ակումբը Բենզեմայի դուբլի շնորհիվ 2:0 հաշվով հեշտ հաղթանակ տոնեց և մեծ հույսով սպասում էր գլխավոր մրցակցի սայթաքելուն:
Ինչպես պարզվեց, մադրիդցիների սպասումները զուր չէին. տուրի կենտրոնական խաղում «Բարսելոնա»-ն չկարողացավ հաղթել «Սևիլիա»-ին: Կատալոնացիները, սովորության համաձայն, առաջին րոպեներից տիրեցին նախաձեռնությանն, ու արդեն 7-րդ րոպեին Մեսսին տուգանայի հարվածից գրավեց Վարասի դարպասը, սակայն մրցավարն անհայտ պատճառով դարպասի գրավում չարձանագրեց: 30-րդ րոպեին Դանի Ալվեշն ամեն ինչ արեց, որ Բոյան Կրկիչը գնդակի հետ հայտնվի մրցակցի դարպասում` 0:1: Խաղակեսի ավարտին մոտ Մեսսին հաշիվը կրկնապատկելու հրաշալի հնարավորություն ձեռքից բաց թողեց: Չավիի փոխանցումից հետո արգենտինացու գլխով հարվածը ետ մղվեց հորիզոնական դարպասաձողից:
Ընդմիջումից հետո «կապտանռնագույններ»-ի գործողություններում չափից ավելի ինքնավստահություն էր նկատվում, ինչի համար շուտով պատժվեցին: 49-րդ րոպեին Նեգրեդոյի փոխանցումից հետո Խեսուս Նավասը գլխի դիպուկ հարվածով հավասարեցրեց հաշիվը: Անմիջապես հաջորդ գրոհի ժամանակ «Սևիլիա»-ն կարող էր նաև երկրորդ գնդակն ուղարկել Վալդեսի պաշտպանած դարպասը, սակայն հարվածային դիրքում հայտնված Նեգրեդոյի հարվածն աննշան շեղությամբ անցավ դարպասաձողի կողքով: Շուտով Գվարդիոլայի սաները հավաքվեցին և հերթական գրոհների տարափը ձեռնարկեցին տանտերերի դարպասին: Մի դեպքում Մեդելը դարպասային գծի վրայից ետ մղեց Ինիեստայի «կրակոցը», մյուս դեպքում մրցավարը չնշանակեց ակնհայտ 11-մետրանոցը: Նշենք նաև «Սևիլիա»-ի վտանգավոր հակագրոհը, երբ Նավասի հարվածից հետո Վալդեսը փրկեց իր թիմին, և Մեսսիի հուժկու հարվածը, որից հետո հորիզոնական դարպասաձողը երկրորդ անգամ օգնության հասավ տանտերերին: Ինչևէ, «Բարսելոնա»-ն երկու միավոր կորցրեց և արդեն Մադրիդի «Ռեալ»-ին գերազանցում է ընդամենը 5 միավորով:
28-րդ տուրի մյուս հանդիպումներում գրանցվեցին հետևյալ արդյունքները.
«Ալմերիա» – «Ատլետիկո» 2:2
«Սարագոսա» – «Վալենսիա» 4:0
«Օսասունա» – «Ռասինգ» 3:1
«Ռեալ Սոսյեդադ» – «Մալագա» 0:2
«Էսպանյոլ» – «Դեպորտիվո» 2:0
«Լևանտե» – «Մալյորկա» 1:1
«Վիլյառեալ» – «Սպորտինգ» 1:1
«Խետաֆե» – «Ատլետիկ» հանդիպումը կկայանա այսօր:
