Ինչպես հաղորդում է ճապոնական Kyodo գործակալությունը, պաշտոնական տվյալներով, մարտի 11-ի երկրաշարժի և դրան հետևած ցունամիի հետևանքով զոհերի թիվը հասել է 4.5 հազարի: Հազարավոր մարդիկ համարվում են անհայտ կորած:
Մասնավորապես, մոտ 10 հազար մարդ անհայտ կորած է համարվում Միյագի պրեֆեկտուրայում, հազարավոր մարդիկ՝ այլ փոքր ու մեծ քաղաքներում, որոնք հիմնականում եղել են ցունամիից տուժած տարածքներում: Ամենաբարդ իրավիճակը Մինամիսանրիկու քաղաքում է, որտեղ 17 հազար բնակչից մոտ 10 հազարը համարվում է անհայտ կորած: Այս մասին հաղորդում է Associated Press գործակալությունը: Ճապոնական իշխանությունները հայտնում են նաև, որ չի հաջողվել կապ հաստատել մոտ 2.500 զբոսաշրջիկների հետ, որոնք այդ պահին գտնվել են աղետի գոտում:
Մի քանի պրեֆեկտուրաներում զոհերի մեծ թվի պատճառով իշխանությունները չեն կարողանում նույնիսկ հուղարկավորությունները կազմակերպել: Նրանք հարևան շրջաններից դագաղներ և փաթեթներ են խնդրում` դիակները տեղափոխելու և հուղարկավորելու համար:
Հիշեցնենք, որ մարտի 11-ին Ճապոնիայում տեղի է ունեցել ավերիչ երկրաշարժ, որի ուժգնությունն էպիկենտրոնում կազմել է 9.0 մագնիտուդ:
