Լիբիայի պետական հեռուստատեսությունը նախօրեին տարածել է մի հաղորդագրություն, համաձայն որի, Լիբիայի առաջնորդ Մուամար Քադաֆին հանդիպում է ունեցել Ռուսաստանի, Չինաստանի և Հնդկաստանի դեսպանների հետ: Այդ երկրների կառավարություններին Քադաֆին առաջարկել է ներդրումներ կատարել երկրի տնտեսության մեջ. «Դեսպանների հետ զրույցի ժամանակ այդ երկրների նավթային ընկերություններին կոչ է արվել ներդրումներ կատարել Լիբիայի նավթարդյունաբերությունում»,- հաղորդում է RBC-ն՝ հղում անելով Լիբիայի պետական հեռուստատեսությանը:
Այս երեք երկրները պատահական չեն ընտրված, քանի որ նրանք ամենաքիչն են քննադատել լիբիական ներկայիս ռեժիմի գործողությունները ապստամբների դեմ կիրառած ոչ համաչափ ուժի կապակցությամբ՝ ի տարբերություն Արևմուտքի, որը սպառնում է փակել Լիբիայի օդային տարածքը, ինչպես նաև ռմբակոծել Քադաֆիի վերահսկողության տակ գտնվող տարածքների ռազմական օբյեկտները:
Տեղեկացնենք նաև, որ Լիբիայի նավթարդյունաբերական ոլորտը զգալի վնասներ է կրել երկրում մեկ ամիս շարունակ տևած բախումների հետևանքով: Երկրում մինչ այս պահն աշխատում էին այնպիսի ընկերություններ, ինչպիսիք են ամերիկյան ConocoPhillips-ը և ExxonMobi-ն, բրիտանա-հոլանդական Royal Dutch Shellը, իտալական ENI-ն և իսպանական Repsol-ը: Ակնհայտ է, որ Արևմուտքի հետ բացահայտ առճակատումից հետո այս ընկերությունները հանրավոր է՝ զրկվեն Լիբիայում նավթ արդյունահանելու իրավունքից, իսկ դրանց տեղը կարող են զբաղեցնել վերոնշյալ երեք պետությունների նավթային ընկերությունները: Այս սցենարը կարող է աշխատել, եթե Քադաֆիին հաջողվի ճնշել երկրում ծայր առած ապստամբությունը:
