Երեկ «Ֆուկուսիմա-1» ատոմակայանի երրորդ էներգաբլոկում տեղի է ունեցել երկու պայթյուն, որի հետևանքով 11 մարդ ստացել է տարբեր աստիճանի մարմնական վնասվածքներ: Ավելի վաղ հայտնի էր 3 վիրավորի և 7 անհայտ կորածի մասին: Այս մասին հաղորդում է BBC հեռուստաալիքը:
Ըստ Associated Press գործակալության` ատոմակայանում պայթյունների պատճառը ջրածինն է, որը կուտակվել է էներգաբլոկներում` ռեակտորի սառեցման համակարգի շարքից դուրս գալու պատճառով: Պայթյունն այնքան ուժեղ է եղել, որ զգացվել է 40 կմ հեռավորության վրա: Այս պահին հայտնի է, որ մի քանի հարյուր մարդ շարունակում են մնալ Ֆուկուսիմայի ատոմակայանի մերձակայքում գտնվող իրենց տներում: Նրանց հնարավոր չի եղել ժամանակին տարհանել:
Երեկ ամբողջ օրվա ընթացքում Ճապոնիայի իշխանությունները հայտարարում էին նոր վտանգի մասին երկրաշարժից տուժած մեկ այլ պրեֆեկտուրայում` Օնադավայում: Այստեղ միանգամից երեք ռեակտորներում չի աշխատել սառեցման համակարգը: Միաժամանակ իշխանությունները տեղեկացնում են, որ վերահսկում են իրավիճակը: Ամերիկյան գիտնականները վտանգավոր ցեզիում նյութը հայտնաբերել են Ֆուկուսիմայի ատոմակայանից 96 կմ հեռավորության վրա, ինչը նշանակում է, որ պայթյունի հետևանքները բավականին լուրջ են եղել: Այս առումով ամերիկյան և ճապոնական գնահատականները խիստ տարբերվում են, քանի որ ամերիկացիները հայտնել են, որ ուղղաթիռով ուսումնասիրությունների մեկնած մասնագետները մեկ ժամում ստացել են ճառագայթման մեկ տարվա չափաբաժին:
Հիշեցնենք, որ մարտի 11-ին Ճապոնիայում տեղի էր ունեցել հզոր երկրաշարժ, որի ուժգնությունն էպիկենտրոնում, արդեն ճշտված տվյալներով, կազմել է 9.0 մագնիտուդ: Երկրաշարժի, ինչպես նաև դրան հաջորդած ցունամիի հետևանքով զոհվել է մի քանի հազար մարդ, տասնյակ հազարներ համարվում են անհայտ կորած: շարքից դուրս են եկել մի քանի ատոմակայաններ, իսկ «Ֆուկուսիմա-1» ատոմակայանի առաջին էներգաբլոկում տեղի էր ունեցել պայթյուն, կա միջուկային նյութերի տարածման մեծ վտանգ: :
