ՀՀ կառավարության փետրվարի 10-ի որոշումը, ըստ որի` գայլ սպանելու համար այսուհետ յուրաքանչյուր որսորդ պետք է ստանա պարգևատրում` 100 հազար դրամի չափով, դեռ Վանաձոր չի հասել: Մինչ օրս ոչ մի որսորդ խփած գայլի դիմաց սահմանված պարգևը չի ստացել:
Ինչպես «Առաջին լրատվականի» թղթակցի հետ զրույցում հայտնեց Լոռու մարզի որսորդների և ձկնորսների միավորման նախագահ Ֆրունզիկ Աղաջանյանը, հավելյալ ինֆորմացիայի ինքը չի էլ տիրապետում, անգամ չգիտի, թե քանի գայլ է նախատեսվում ոչնչացնել. «Հեռուստացույցով ինչ լսել ենք՝ դա է: Զանգել եմ ՀՀ որսորդների ու ձկնորսների միության նախագահին, ինձնից 5 որսորդի ցուցակ են ուզել: Ստաժավոր, զգոն որսորդների ցուցակ եմ ներկայացրել»,- ասաց նա:
Ըստ Ֆ. Աղաջանյանի, դրանից այն կողմ գործը չի գնացել: Զրուցակցիս խոսքով, ոչ միայն գայլերի թիվն է ավելացել վերջին տարիներին, այլ նաև անտառներում կենդանիների թիվն է պակասել, և դա է պատճառը, որ ահազանգերը բնակիչների կողմից շատացել են:
«Նախկինում բնակչության կողմից այսքան բողոքներ չկային, ահավոր, ճչացող բաներ չէին լինում: Հիմա ահազանգում են մարզպետին, մարզպետն՝ ինձ, խառնվում ենք իրար: Գայլերին՝ անտառի սանիտարներին, անիմաստ ոչնչացնել չի կարելի, սակայն միջոցներ ձեռք առնել պետք է», – ասում է որսորդմիության նախագահը:
Մեկ-երկու տարի առաջ որսորդներն անգամ Վանաձորի կենտրոնում՝ կենտրոնական հանրախանութի մոտ էին գայլ հայտնաբերել և սպանել. գայլը սովորական թափառական շան նման աղբամաններում ուտելիք էր փնտրում: Ու հիմա էլ Լոռու մարզում որսորդները գայլեր պարբերաբար սպանում են, սակայն անորոշ վիճակի պատճառով Ֆ. Աղաջանյանը չգիտի ինչ անել.
«Անորոշ վիճակ է. ասում եմ` պարզ չի, չեմ կարող ասել գայլը բեր՝ տանենք նախարարություն` գումարը ստանալու: Որոշման ենք սպասում, թե ինչպես ենք ներկայացնելու, կոմիսիա՞ է լինելու, որ նայեն գայլ է, գայլ չի… Կոնկրետ որոշում չունեմ ձեռքիս տակ, անորոշ վիճակ է, որ դրանով առաջնորդվեմ»,- ասում է փորձառու որսորդը:
Ստեղծված իրավիճակն ավելի է անորոշ դառնում, քանի որ գարնան գալու հետ փակվել է նաև որսաշրջանը: Բեղմնավորման շրջանում որսն ընդհանրապես արգելված է և անգամ հմուտ որսորդը չի պատկերացնում, թե կառավարության որոշումն ինչպես է իրականացվելու.
«Զանգում եմ նախարարություն՝ էնտեղից ինձ ասում են, որ բնապահպանության նախարարությունից էսա գրություն կստանաք, որոշում կստանաք, թե ինչ ձևով որսորդին կհատկացվի էդ 100 հազար դրամը: Հիմա սպասում ենք…»,- իր խոսքը եզրափակեց Ֆ.Աղաջանյանը:
Լուսանկարը՝ Էդվարդ Արզումանյանի