«Մասնակցությունը շատ բարձր էր, ճիշտն ասած՝ ես ակնկալում էի, որ մասնակցությունն ավելի քիչ կլինի»,- «Առաջին լրատվական»-ի հետ զրույցում այս մասին ասաց ՀՀԿ խմբակցության պատգամավոր, հաշվիչ հանձնաժողովի նախագահ Սուքիաս Ավետիսյանը՝ անդրադառնալով ԱԺ նախագահի ընտրություններին:
Հարցին, թե փաստորեն չէ՞ր սպասում, որ ԲՀԿ-ական պատգամավորները այդպիսի մեծ հոսքով կգան և կքվեարկեն, Ավետիսյանն ասաց․«Ճիշտն ասած՝ շատ լավ գիտեք, որ մինչև երեկ երեկոյան հայտնի չէր, թե տարբեր խմբակցություններ ինչպես են մասնակցելու, երեք խմբակցություն հայտարարել էին, որ ընդհանրապես չեն մասնակցելու և այսօր նոր պարզվեց, որ մասնակցեցին ու քվեարկեցին»:
Պատգամավորի խոսքերով՝ ԲՀԿ-ի՝ Գալուստ Սահակյանի օգտին տված ձայները պայմանավորված են նաև նրա անձով․ «Երկար տարիներ աշխատել է, շփվել է բոլորի հետ, կոալիցիայի մեջ են եղել, հետո նաև թեկնածուների սակավությամբ»:
Սուքիաս Ավետիսյանը հավելեց, որ Գալուստ Սահակյանը ամենաերկարակյաց պատգամավորն է ԱԺ-ում, որպես խմբակցության ղեկավար մեծ փորձ ունի, ՀՀԿ փոխնախագահն ու հիմանադիրներից է կուսակցության՝ դրանք իրար գումարած ստացվում է, որ ճիշտ որոշում են կայացրել:
Հարցին, թե այդ դեպքում ինչո՞ւ էր սկզբում ԱԺ խոսնակի պաշտոնն առաջարկվել Կարեն Կարապետյանին, մեր զրուցակիցն ասաց․ «Կարեն Կարապետյանն էլ երկար տարիներ աշխատել է ԱԺ-ում, քաղաքական-պետական աշխատանքի փորձ ունի և Կարեն Կարապետյանին սկզբից առաջարկվել է՝ հաշվի առնելով տարիքը, որ ավելի երիտասարդ լինի»։
Հիշեցնենք, որ ԱԺ նախագահի ընտրությունների քվեարկության արդյունքներներով ՀՀԿ խմբակցության ղեկավար Գալուստ Սահակյանը ստացել է 101 կողմ, 3 դեմ, իսկ 3 կողմ, 1 դեմ ձայն ստացել է Հրանտ Բագրատյանը: Քվեարկությանը մասնակցել է 106 պատգամավոր:
Մանրամասները՝ մեր տեսանյութում