«Բանակցություններն ունեն ինչպես երևացող, այնպես էլ` չերևացող մաս: Իմ կարծիքով, երբ հայտարարում են դիրքորոշումների մոտեցման մասին, նշանակում է` բանակցությունների արդյունքում ավելի է հստակեցվել մոտիվացիան: Ուզում եմ հիշեցնել Ռիգայում պարոն Սարգսյանի մեկ այլ հայտարարություն, որ մեզ համար ընդունելի է երեք սկզբունքների և չափանիշների միաժամանակյա գործողության մեջ դնելը, համադրելը, և անընդունելի է երեք սկզբունքներից որևէ մեկին առավելություն տալը»,- «Առաջին լրատվականի» հետ զրույցում Սերժ Սարգսյանի` ԼՂ խնդրի մասին Ռիգայում արած հայտարարություններն այսպես մեկնաբանեց ԱԺ ՀՀԿ խմբակցության պատգամավոր Հովհաննես Սահակյանը:
Հիշեցնենք, որ Ս.Սարգսյանը հայտարարել էր, թե ԼՂ խնդրում Բաքվի դիրքորոշման մեջ որոշակի առաջընթաց կա, և մոտ ապագայում հնարավոր կլինի որոշակի համաձայնության հասնել ԼՂ խնդրի կարգավորման սկզբունքների շուրջ:
Ըստ Հովհաննես Սահակյանի` հակամարտությունների կարգավորման գործընթացը երբեք չի կարելի տեղավորել հստակ ժամկետների մեջ, քանի որ կոնֆլիկտը մաթեմատիկական ճշգրտության բանաձևի նման չէ, որի լուծման համար վերջնաժամկետներ նշվեն: