Ս.Սարգսյանը խոսում է մոտ ապագայում ԼՂ խնդրում համաձայնության հնարավորությունների մասին:
Մենք դեռ Սոչիի բանակցություններից առաջ արձանագրել էինք, որ ԼՂ կարգավորման բանակցային գործընթացի շարունակականության փաստը` Սոչիի հանդիպման կազմակերպումը, տեղի ունեցավ ՌԴ-ի և ԱՄՆ-ի ջանքերի շնորհիվ, և որ ակնհայտ է, որ Իլհամ Ալիևին բանակցությունների սեղանի շուրջ են վերադարձրել, որ Բաքուն վերջին շրջանում դժգոհությունը թաքցնում էր զուսպ լռությամբ:
Որ Բաքուն նեղսրտած է` փաստում է թե՛ պաշտոնական Բաքվի պահվածքը, թե՛ պաշտոնական Երևանի հայտարարությունը: Սերժ Սարգսյանը Ռիգայում, մեկնաբանելով մարտի 5-ին Սարգսյան-Ալիև-Մեդվեդև եռակողմ հանդիպման արդյունքները, հայտարարել է, թե Ադրբեջանի դիրքորոշման մեջ որոշակի առաջընթաց կա, հայտնել է, որ «մոտ ապագայում հնարավոր կլինի որոշակի համաձայնության հասնել ԼՂ խնդրի կարգավորման սկզբունքների շուրջ…»: Նախ նկատենք, որ Ս.Սարգսյանի վերոնշյալ հայտարարությունից չի կարելի անմիջապես բխեցնել, թե պաշտոնական Երևանը անհամբերությամբ սպասում է կարգավորման գործընթացի հանգուցալուծման: Ամենևին` Ս.Սարգսյանի նշյալ հայտարարությունը, թերևս, առավելապես ներքին սպառման համար է, և այստեղ ընդդիմությանը դարձյալ բանակցային գործընթացի «կարևոր հանգրվանում» հանրահավաքներ անցկացնելու համար մեղադրելու արդեն ավանդական դարձած մանևրն է գործի դրվել:
Ինչևէ, անդրադառնանք պաշտոնական Բաքվին: Մինչև Սոչիի հանդիպումը Ադրբեջանի ԱԳ նախարարը հարցազրույց է տվել «Մեդիամաքս» գործակալությանը: Նա շեշտել է, որ ԼՂ հակամարտության կարգավորումը կառուցվում է միջազգային իրավունքի նորմերի և սկզբունքների և այդ շրջանակներում ընդունված որոշումների և փաստաթղթերի հիման վրա, ինչպես դա նշված է 2008թ. նոյեմբերի 2-ին ստորագրված Մայենդորֆյան հռչակագրում: Պատասխանելով հարցին, թե Ադրբեջանի իշխանություններն ինչո՞ւ չեն դադարեցնում հակահայկական հռետորությունը, Մամեդյարովը ասել է. «Հայկական զորքերի դուրսբերումն ադրբեջանական տարածքներից բոլորովին այլ իրավիճակ կստեղծի տարածաշրջանում: Մենք առնվազն կկարողանանք խոսել իրավիճակի զարգացման կանխատեսելիության, հաղորդակցությունների բացման, կորսված վստահության վերականգնման մասին»:
Հունվարին Է.Նալբանդյանը նշել էր, որ Հայաստանը որպես հիմք է ընդունում ԼՂ կարգավորման 3 սկզբունքներն ու 6 բաղադրիչները: «Ինչ վերաբերում է Ադրբեջանին, ապա նա հայտարարում է, որ ընդունում է միայն տարածքային ամբողջականություն սկզբունքը և տարածքների վերադարձի դրույթը: Ադրբեջանին հարկ է կողմնորոշվել և հստակ պատասխան տալ. կա՛մ նա ընդունում է բոլոր սկզբունքները և դրույթները, կա՛մ` ոչ»,- ասել էր Է.Նալբանդյանը:
Այս առիթով Մամեդյարովը հակադարձել է. «Դա ուրախալի փաստ է, և կարծում եմ, որ դա կարող է հնարավորություն ստեղծել սկսելու աշխատել մանրամասն Խաղաղության համաձայնագրի ուղղությամբ: Ահա այդ ուղղությամբ տարվող աշխատանքը պետք է սահմանափակել ժամանակային շրջանակներով, որպեսզի խուսափենք հավերժ բանակցություններ վարելու գայթակղությունից` առանց տեղում իրավիճակի փոփոխության: Ի դեպ, բոլոր 3 սկզբունքները և 6 բաղադրիչները հանդիսանում էին նորացված Մադրիդյան փաստաթղթի հիմքը, որը փոխանցվել էր Հայաստանին և Ադրբեջանին 2009թ. Աթենքում` ԵԱՀԿ ԱԳ նախարարների գագաթնաժողովի ընթացքում: Ցավոք, մենք կորցրեցինք ավելի քան մեկ տարի, չնայած մարտի 5-ին Սոչիում նախագահների հանդիպման ժամանակ կարելի էր որոշակի դրական միտումներ նկատել դեպի Խաղաղության համաձայնագրի վրա աշխատանքի մեկնարկը շարժվելու ուղղությամբ»:
Նախ արձանագրենք, որ Բաքուն ամրագրում է, որ Ս.Սարգսյանի կողմից ներկայացրած հանրաքվեի անցկացման ժամկետը դեռևս Ադրբեջանի համար մնում է ոչ ցանկալի պահանջ, և արդարանում է, հիշեցնում է, որ կարգավորման 3 սկզբունքները և 6 բաղադրիչները նորացված Մադրիդյան փաստաթղթի հիմքում էին, որոնք փոխանցվել էր Հայաստանին և Ադրբեջանին 2009թ. Աթենքում: Ասել է թե` միջազգային հանրությանը հիշեցնում է, որ Բաքուն վաղուց էր ընդունել այդ սկզբունքները, սակայն Երևանն է հետո բարդություններ առաջացրել կարգավորման գործընթացում:
«Ժամանակ» օրաթերթ