Հայ-ռումինական առեւտրատնտեսական եւ գիտատեխնիկական միջկառավարական համատեղ հանձնաժողովի 3-րդ նիստի գումարման շրջանակներում պաշտոնական այցելությամբ Բուխարեստում գտնվող ՀՀ տրանսպորտի եւ կապի նախարար Մանուկ Վարդանյանը մարտի 11-ին այցելեց Ռումինիայի Խորհրդարան, ինչպես նաեւ հանդիպումներ ունեցավ ռումինական մի շարք ընկերությունների ղեկավարների հետ:
Համակարգչային ծրագրավորման բնագավառում ռումինական առաջատար SIVECO ընկերության փոխնախագահներ Ֆլորիան Չոլակուի/Florian Ciolacu եւ Կոստել Թոդորի/Costel Todor հետ հանդիպմանը քննարկվեցին ընկերության հետ համագործակցության հնարավորությունները: Ընկերությունը, անցյալ տարի հուլիսին Հայաստան կատարած այցից հետո, առաջարկում է գործունեություն ծավալել կրթության, առողջապահության,մաքսային համակարգի, էլեկտրոնային կառավարման եւ գյուղատնտեսության ոլորտներում, մասնավորապես eGovernment լուծումներում,ինչպես նաեւ eLearning էլեկտրոնային կրթական ծրագրերում, որ նրանք արդեն ներդրել են Ռումինիայում եւ այլ երկրներում:
Պայմանավորվածություն ձեռք բերվեց առաջիկայում կազմակերպել ընկերության պատվիրակության եւս մեկ այց Հայաստան` տեղում բանակցությունները շարունակելու եւ կոնկրետ համաձայնությունների հասնելու նպատակով:
Այնուհետեւ Մանուկ Վարդանյանն այցելեց հոլանդա-ամերիկյան UTI Holding BV-ի մեջ մտնող ռումինական UTI Group ընկերություն, ծանոթացավ Բուխարեստի քաղաքային տրանսպորտի, ինչպես նաեւ ազգային մայրուղիների էլեկտրոնային կառավարման աշխատանքներին, որ մշակել եւ իրականացնում է ընկերությունը: Ընկերության ղեկավարների հետ կայացած մտքերի փոխանակմանը, որի ընթացքում վերջիններս հանգամանորեն ներկայացրեցին բարձր տեխնոլոգիաների միջոցով այդ բնագավառում իրենց մշակած արդյունավետ լուծումները, պայմանավորվածություն ձեռք բերվեց շարունակել փոխշփումները համատեղ ծրագրեր նախաձեռնելու հնարավորության շուրջ:
Նույն օրը Ռումինիայի Խորհրդարանում Մանուկ Վարդանյանը հանդիպեց բարձր տեխնոլոգիաների բնագավառում հեղինակավոր մասնագետ, բնագավառի օրենսդրական կարգավորման նախաձեռնող, Ռումինիայի Խորհրդարանի ազգային փոքրամասնությունների խմբի նախագահ Վարուժան Փամբուկչյանի հետ: Վարուժան Փամբուկչյանը ներկայացրեց այն գործնական եւ օրենսդրական քայլերը, որոնց միջոցով վերջին 15-20 տարիների ընթացքում հնարավոր է եղել Ռումինիայում զարգացնել բարձր տեխնոլոգիաների ոլորտը` ներկա դրությամբ այն հասցնելով աշխարհում չորրորդ հորիզոնականին:
Վարուժան Փամբուկչյանը, բարձր կարծիք հայտնելով բնագավառի հայ մասնագետների կարողականության մասին, ինչպես նաեւ նշելով Հայաստանի զարգացման առումով ոլորտի հեռանկարայնությունը` պատրաստակամություն հայտնեց ռումինական փորձը փոխանցել Հայաստանին: